心癮

為左要做個又靚又FIT嘅新娘，基本上已經戒食好多零食....朱古力、糖、薯片、甜野等等.....我都好耐冇食啦！

對於我依隻為食豬都幾辛苦，有時見到人地食，都真係好心思思去食呀~~不過為左靚都要忍啦！

唔知係唔係已經習慣左，依家都唔係太心掛掛去食零食，但唯一一樣野我戒唔到就係 - 檸檬荼(仲要係維他牌)

我都可以話係檸檬荼怪，由三年前開始，我基本上都係每日一包，有時仲兩包呀！但因為大肥豬覺得我飲得太狼死，同埋冇益，所以趁我依家要減肥，就要我戒.....

我最叻嗰次係試過有一個多星期冇飲過，之後....頂唔順偷偷地買一包嚟飲，嗰包真係最好味呀！

依家...我又開始要迫自己唔好飲，都已經好幾日冇飲過，所以檸檬荼癮又嚟啦！

不過我真係要迫自己唔好飲，希望真係可以戒左佢啦！

真係唔知點解，一日唔飲就好似成身唔舒服，依D唔知係唔係叫心癮呢？