【清熱解毒】牛大力土伏苓粉葛豬骨湯

19 JANUARY 2017(THU)

依排天氣都總係帶點點潮濕，依啲天氣又真係好容易令人皮膚搔癢，而且又會成日都好似易倦兼腰痠背痛，所以今日去街市買材料煲時，店主就介紹我煲依個牛大力土伏苓粉葛豬骨湯啦~
 
其實一聽到個名就好似好複雜，我初頭都有啲抗拒，打算簡單買個紅菜頭嚟煲就算。不過店主又好詳細咁同我介紹，一聽到話可以祛濕解毒，好啱濕疹人仕飲，我已經有一半興趣。再聽埋話佢會幫我切好晒，返屋企只係沖洗一下就煲得，所以就請店主幫我執一份材料試下煲啦！ 

材料：牛大力 4兩、土伏苓 4兩、粉葛一件、赤小豆及扁豆約一兩、豬尾骨$50、陳皮一角及蜜棗4粒~

 

雖然店主講到好利害，不過第一次煲都要上網睇下啲資料，睇下三樣主角係乜東東嘛！  

 牛大力 - 補虛潤肺，強筋活絡，治療腰肌勞損，風濕關節炎~

 

土茯苓 - 除濕解毒，通利關節，治療皮膚痕癢~ 

 

粉葛 - 解熱退燒，降低血糖，透疹止瀉，治療熬夜頸背筋骨酸痛~

 

牛大力、土伏苓及粉葛由於已經切好晒，所以用水沖洗幾次就得(真係好方便哦)；蜜棗、赤小豆及扁豆浸洗一陣；果皮浸軟刮囊；豬骨汆水~ 

 

煲內加入約4L水，然後加入果皮~

 

待水滾後加入所有材料~ 

 

繼續用大火加蓋煲約30分鐘~ 

 

之後轉慢火加蓋煲多2小時~ 

 

最後加鹽調味，就飲得啦~

 
小小豬一見到碗湯佢就有點抗拒，依一點我一早就估到，因為佢一向都唔鐘意飲烏卒卒顏色嘅湯，不過可以祛濕解毒兼對濕疹好，所以小小豬都係半推半就飲左大半碗啦！ 

其實味道又唔係好差，只係我比較少煲依啲山草藥湯唔多習慣，同埋豆味重左啲啲所以小小豬唔鐘意飲味道，我同老公都覺得唔錯，同埋間中解下身體嘅毒，人都健康啲呀！



溫馨提示：由於個人體質都有所不同，我啱飲時又未必每個人都啱，所以大家記得煲之前了解下自己，或者問下相熟中醫/藥材店職員，呢個湯料啱唔啱自己呀！

**我地的FACEBOOK PAGE，齊齊來交流親子。育兒。烹飪啦**