【祛濕清腸胃】竹芋粟米紅蘿蔔栗子素湯

25 OCTOBER 2020(SUN)

係有機店買蔬菜時，店主姨姨強烈推介我買份竹芋嚟煲湯，仲話竹芋好啱依家天氣飲，最好就係可以祛濕同清腸胃，而且簡簡單單加栗子、粟米同紅蘿蔔等等就可以煲出甜甜地嘅靚湯。

聽落又好似幾啱小小豬飲，所以就請姨姨幫我執返一返材料，試下煲依個竹芋粟米紅蘿蔔栗子素湯~

竹芋一斤(約五條)、栗子半磅、粟米一條、紅蘿蔔一條、茨實一両、南北杏半両、椰棗四粒、陳皮一角及腰果約一飯碗~

竹芋我都係第一次煲，聽店主姨姨講竹芋一年先有收成一次，大約中秋節時段就會有，初期比較幼嫩會啱炒菜食用，依段時候出嘅就會老身少少，所以啱用嚟煲湯啦~

處理竹芋都唔係好難，只要撕掉外面嗰層啡色外皮，見到白雪雪嘅肉就可以切段備用~

陳皮浸軟後刮瓤~ 

茨實、南北杏、椰棗及腰果浸洗一陣~

紅蘿蔔去皮切塊，粟米洗淨切段~ 

栗子洗淨去衣~

煲內放約3L水，然後隨水加入陳皮~

待滾起後，加入所有材料~ 

繼續用大火加蓋煲約15分鐘~

之後轉慢火加蓋煲多2小時~

最後加鹽調味，就可以飲得啦~

姨姨又真係冇介紹錯，啖湯煲出嚟又真係幾甜，其實個味同普通粟米紅蘿蔔湯差唔多，所以完全係小小豬杯茶，佢仲飲左兩大碗添。

不過竹芋如果當餸食就真係麻麻，因為咬落真係好多"根"，而且又太硬了，所以都係用嚟煲湯啱我多啲...哈哈！

以下係各食材嘅功效，可以參考一下呀(網上資料)： 

竹芋 - 具有清肺止咳，助祛濕清腸胃及清熱利尿之功效。亦具有美容養顏、促進新陳代謝，排毒等功效。 

栗子 - 健脾胃、有助增進食慾 

粟米 - 健脾和胃，利水通尿，益肺寧心。 

紅蘿蔔 - 就有助健脾消食，同埋化痰解毒。 

茨實 - 有補脾化濕、益腎固精功效。 

南北杏 - 可止咳下氣，潤燥消積。 

椰棗 - 天然有豐富纖維和營養，可補中益氣、止咳潤肺、補血等。 

陳皮 - 有通氣健脾，消滯健胃的功能。 

腰果 - 湯中加入腰果，可令湯更鮮甜濃稠，卻不會像肉湯般油膩。 

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！