強烈推介

雀巢出左一支新雪條呀！就係FRUITO，佢有兩種味，一種係士多啤梨藍梅味，另一次係芒果味！

我上次試過食過，真係好正呀~~又唔太甜...又好香士多啤梨味。

最好就係.....佢係乳果雪條，仲寫明係99% FAT FREE，真係...好啱我地要講減肥嘅人呀！(哈哈~~講要減肥就真係應該唔好食，不過有時真係忍唔住呀！)

今日行過OK便利店，見到又忍唔住買左呀！

成日話要減肥...但又係度食甜野，雖然佢係話99%FAT FREE，但都真係.....

死啦...又食...今次又真係肥幾磅啦！

咁都有野送

大家都知結婚真係要用好多錢呀，用新咭簽，可以一舉兩得，既可以攪到結婚野，又可以有新禮品用。

我地之前見匯豐同東亞信用咭有迎新禮物送，所以我地咪都申請啦！經過我地又買介指，又俾婚紗錢，仲有買D濕碎野...我地已經好快咁拎左兩部相機啦！(哈哈~~真係都幾肉痛呀~~大出血呀！)

跟著嚟緊我地要去係八月俾酒樓第二次訂，所以都睇吓有冇新信用咭有迎新好禮品啦！又可以換D禮物嘛！(自己都覺得好師奶仔呀！)

不過依排都真係好靜，冇乜好野送。

之後係永隆銀行見都有把電風扇送，睇個樣都好似幾OK，可以留番第日屋企用，所以尋日就去左拎FORM填好晒，叫媽咪今日幫我去交表啦！

點知...媽咪打電話同我講，幫我交完表次後，個職員話送左張$50百佳COUPON俾佢，話唔知乜野宣傳....真係好攪笑呀！

張COUPON當然送左俾媽咪，等佢去行超市買野啦！

唔好理佢乜原因啦，最緊要就係有野送嘛！哈~~哈~~哈~~~

 

落雨好狼狽

一早起身見個天色都唔係太好，怕會大落雨，所以就費時著裙同妹仔鞋，所以咪著波鞋牛仔褲番工啦！我都怕難搭車，所以都早左少少出門口。

當我離開屋企時都好好地，點知我一落到去小巴站..就開始落雨，仲越落越勁，但等小巴嗰度係露天，所以我都唔知點好，走又唔係，唔走又唔係..都真係幾狼狽呀！係依個時間我條褲腳都已經開始濕啦~真係好唔舒服呀！但都冇辨法，要繼續等車嘛！唔知點解等極都係冇車，等小巴..就冇位，巴士同的士又冇車，真係好鬼死激氣呀！

不過最激氣同黑仔嘅事就係依一刻嚟啦！

雨越落越大，我都冇辨法，為有要行過少少去巴士站等車啦！係依個時候，有一部小巴駛過，我以為係我要搭嗰部，就行出左少少..點知，嗰部車係一灘水前行過，D水花飛晒，直頭潑晒係我度呀！好在我都算閃得快，上身就冇事，只係下半身同對鞋超勁濕！不過..原來唔係我要搭嗰度車，真係唔抵，俾佢整完又冇車上。

最後，我地等到部的士返工，就我真係濕晒啦！仲要遲到呀！真係慘~~

返到學校仲俾同事笑我著錯衫，佢話牛仔褲同波鞋都係好難乾，叫我下次係落雨天唔好咁著，著條裙仔易乾D呀！之後就借左個風筒俾我吹，加上我自己又用把細細電風扇吹，先叫乾左少少，舒服番少少呀！

真係~~我以為係落雨著牛仔褲同波鞋可以方便D，唔好滑倒。點知原來係麻煩左，今日真係懶醒著錯衫呀！

收到免費飛

哈哈~~今日收到呀！

係七月個婚紗展嘅免費入場卷，不過唔知點解佢會寄俾我呢？我估可能上次係我參加左生活易個抽獎找入場卷，佢有我D資料，所以今次就寄埋俾我啦！

我又有一個藉口可以去行吓婚紗展啦，但我都唔知入去做乜好，因為好似有多野應該入去買嘅野，都好似已經攪好左！如果到時有時間先入去行吓啦！

不過....點解佢地只係送一張飛呀...咁孤寒，去親都係兩個人，當然係應該俾兩張我地嘛！

不過唔緊要啦~~依家都已經慳左少少~~~都好呀！

 

我都買左啦

早排係珍珍個BLOG見佢買左個『囍』字印仔給落去D餅咭上面，覺得好特別，都有諗住買番個整吓。

剛剛經過間鋪頭仔，竟然俾我無意中見到有得買，仲只係$35，好抵呀！所以我就買左一個啦！不過唔知係唔係新嘅關係，要好大力印落去先得呀！雖然係要好用力，但又幾好玩哦。

但有一個好大嘅問題~~就係當係個『囍』字印去唐餅咭信封時，可能個開口位唔係太好，所以印到個『囍』字有少少變形。

依家我將個『囍』字印係信封面，唔知會唔會好怪呢？大家俾D意見呀~~

希望收到張餅咭嘅朋友仔都覺得有心思啦！

 

打第二針

今日又去左家計會打第二支預防乙型肝炎針，打埋今次，就得番十一月嘅第三針，就打晒啦！可以免除左第日生BB時個BB有乙型肝炎嘅機會啦！

講真，今次又真係唔覺得痛哦，係姑娘叫名入打針房時有少少緊張同驚，當坐定之後就冇感覺啦，只係一吉入去嗰一吓有少少麻痺，成個過程我都好輕鬆，好快打完成左啦。

不過~~~大肥豬就(哈..哈..哈...)佢好緊張呀！我係打針房出面都聽到姑娘不停咁叫佢放鬆，唔好緊張。之後我仲係門口偷偷地望入去，見佢個樣真係好緊張呀！佢嗰時個樣真係好好笑呀！

哈哈哈~~終於有一樣野係我叻過佢啦！就係我唔怕打針呀！

 

影熊貓

今日見冇乜特別野做，就捉左大肥豬出去尖沙咀行街街啦！其實主要都係去海港城影相，因為我知道海港城出面又好多熊貓公仔迎回歸。對我一個咁鐘意影相嘅人，當然要去影啦！

不過...今日個天氣真係好鬼死熱，我地行左一陣星光大道都已經出晒汗，成個人都冇晒心機呀！不過，當行到去熊貓嗰度，又成個人都精神番晒，因為又可以影相啦！

嗰度其實有九隻熊貓，每一隻都係一樣，只不過係個顏色唔同，有D顏色都唔係咁靚。所以都唔係每一隻都有影呀~~

不過有一隻我就影左好耐，就係1999年依一隻啦！因為.....依一年係我同大肥豬開始拍拖嘅一年，好有記念呀！同埋佢個顏色又係我鐘意嘅綠色~~真係橋呀！

影依張相都有個小趣事，因為幫我地影相嗰位人兄好似好PRO(佢手拎嗰部相機係專業用機)。當我想找人幫我地影合照時，見佢只係睇野，咪請佢幫我地影啦，點知佢左行右行，又等左好耐，好似幫我地睇位咁。嗰時我個心都有少少驚呀~~唔知佢想影乜嘛！

但當影完睇番張相又幾OK哦！真係攪笑呀！都冇諗過咁好呀！

同場加映：

我見今日去開海港城，咁就打算去試吓有冇KARY件T-SHIRT換啦，但都唔抱咁大期望可以換到~(因為我買左佢CD都成幾個星期，佢隨CD有COUPON去換呀！)

哈哈~~又好彩地俾我換到件T-SHIRT呀！依件SHIRT好似話係KARY設計呀！

雖然件衫都應該唔會點著出街，但換到又覺得好開心哦！我都係第一次換依D贈品呀！

死啦~~我D師奶仔心態又再一次出現啦！

又係我問題

今日我地學校開小一新生家長會，作為一個小小嘅書記，當然冇乜特別工作，只係留係校務處STAND-BY。

原本都冇乜問題，一路都好平平淡淡，點知到差唔多完嘅時候，就有遇到件衰事，真係激死我啦！

個家長會係四點鐘左右就完結，之後家長就要攪一輪出年嘅校服、校車登記......等等。

係依個時候，有一個家長衝入嚟校務處 ，話佢係剛剛嚟冇開到家長會，要我講番晒家長會講過D乜同派個D乜，等佢知道哦！

因為我成個下午都留左係校務處，當然唔知係講過乜，同老師又冇同我地講過內容係乜。所以我唯有好有禮貌同家長講：唔好意思，因為我冇去聽到個會，所以唔係太清楚講過嘅內容，不如你出去問吓D老師，睇吓佢地可唔可以幫到你。(因為出面有好幾位主任級老師企左係度)

點知...個家長又係度罵：又係你地D老師叫我入嚟，依家又叫我出去問，究竟你點呀，你點做野呀？

聽完真係火到嚟埋，但又唔可以話番佢。我就立即請個工友姐姐叫個主任入嚟同番個家長講啦！嘩~~個家長真係....一見個主任入嚟，個態度就180度改變。

當個主任處理完個家長之後，就問我乜事，好在個主任都好好人，知道係乜事，仲話唔係我問題，叫我唔好埋佢。

好在依個主任明白事理，如果換左第二個，又一定話係我錯呀！

雖然，個主任冇話我，仲明白我處境，但都真係好鬼嬲呀~~點解D人變面咁利害呀，真係唔夠一分鐘，個面口就可以有咁大改變呀！

仲有...點解一有問題就入晒嚟找我地呀！我地雖然係最前線，但唔係最多資料呀~~有好多野其實我地都唔知呀！唔好成日都係咁啦！

新天地婚紗MV

剛剛收到~~真係新鮮爆熱辣呀！剛剛糖糖係MSN SEND俾我，係我個婚紗MV呀~~

當我睇完，真係~~嘩！好正呀！完全唔似係第一次整呀！真係好叻呀！

真係十分...十分....感謝我個好同事  糖糖 ，佢真係幫我解決左一個大問題呀！

因為我計過，仲欠一隻席前播嘅婚紗MV，但我自己又唔知點解整唔到(可能部電腦唔得呀！)。但糖糖知道後，就一口應承幫我整，仲要整得咁正~~~真係感動到.....唔知講乜好啦！

大家去睇吓呀~~俾D意見我地呀！

 

 

嘅開心但擔心

首先講左件開心事先啦！

真係替小賢開心呀~因為佢今日好順利咁上網拎到個註冊籌，仲要係2號籌呀，真係勁呀！希望小賢到時可以順順利利咁揀到個好時間啦！

就係依件事，令到我自己都好開心啦~~可能見到個朋友順利整好一件重要事啦！同埋好似對自己到時拎籌個信心大左(我成日都好擔心BOOK唔到個註冊處呀！)。因為今朝我都有份幫小賢手打電話去婚姻註冊處拎籌，發覺原來都好容易打通，個程序都好簡易，加上聽小賢講上網登記都唔難。我估到我要拎籌時個問題都應該唔大，應該都可以拎到好籌呀！

擔心就係，睇番小賢個經驗，佢要結婚前3個月去註冊處交擬結婚通知書。睇番我自己個時間，12月3日前3個月就即係9月3日啦，咁就大件事...因為依日就係開學日，係依個情況吓老細都應該唔會俾人請假，如果冇得請假，我又點交擬結婚通知書呀！

平日請假都已經咁難，你仲要係開學日請假咪仲死！如果係，到時唯有預早同佢講我要去攪結婚野，希望佢可以放我一馬啦！冇理由為左依個原因而唔去攪註冊呀！(我地決定只係註冊處註冊，因為大肥豬覺得去註冊處好D呀！)

真係好煩，又好擔心呀~~唔知點好呀！

 

投我票啦

依排見好多BLOG友仔都參加左Sony Ericsson 舉辦嘅 Share the real life 比賽。

所以我都貪得意參加左啦！好似有多個地方記錄吓我地個生活點滴，當係一個留念呀！

雖然我都知道我贏出嗰機會都真係好微，都係志在參與吓，但都希望大家可以支持吓啦！

請各位BLOG友仔幫忙去下面條 link 去投我神聖一票啦！http://www.sonyericsson.com.hk/sharethereallife/blog_votethis.asp?blogID=497

唔該晒~~有你地嘅支持，我真係感激感激！

我會繼續寫好我個BLOG呀！哈哈~~

糖糖又一靚傑作

尋晚臨訓同 糖糖 傾左一陣MSN，之後佢又SEND左個FILE俾我。

打開嚟睇~~~只能講一句：嘩！好鬼靚呀！好鬼鐘意呀！

我仲立即幫個我BLOG同部電腦換左做WALLPAPER呀！

糖糖成日都幫我整野，真係又要我內疚啦！

講真，識到佢真係我嘅幸運之一(不過可能係佢嘅不幸，成日都要幫我整野~哈哈！)，佢成日都唔覺唔覺就幫我整好多野俾我結婚用，又Q版公仔啦、靚靚效果相啦。佢知我整唔到婚紗相MV，就立即叫我俾晒D野佢幫我整。因為整嗰D真係好浪費時間同心機，但糖糖都真係冇要求咁幫我整，所以真係既感動又開心但又內疚呀！都唔知點報答佢好啦~~我一定會請佢食番餐好好好豐富嘅LUNCH，同真係要再一次錫啖佢先得啦！

有時諗，其實我都唔係真係好黑仔呀！係屋企有媽咪同大肥豬錫，佢公司又有糖糖依D好同事關心，係BLOG又識到好朋友，所以...上天對我都真係唔差啦！

雖然可以有時會係某方面真係唔係咁開心，但有咁多人錫我同關心我，都夠啦！

南瓜炒肉片

哈哈~~上個星期偷懶左，冇學煮餸，俾大肥豬話我冇恆心，所以今日又要學煮新餸，叻番一次先得！

依個就係今日學嘅餸，就係南瓜炒肉片啦！

南瓜....我真係好鐘意食呀！記得之前都唔係好鐘意食，不過有一次係個酒樓食飯試過，就真係愛上左食南瓜呀！但就一定要煮得好『林』先至係最好味。

之前媽咪煮親南瓜，我都叫佢煮『林』D，不過次次都俾媽咪話煮得太『林』就唔好食~~

今次係我煮，就係我話事啦！哈哈~~我當然係煮得『林』少少，真係好好味呀！(又係度自己讚自己，真係唔知醜啦~~哈哈！)

不過原來南瓜都幾難整，削佢個皮真係好難呀，因為個皮又厚又實....都幾難切呀！

今次我都覺得自己整得OK，係後尾落多左少少水，好似個汁好左D。

下次我一定會跟進番依個問題，改善一吓，等我可以煮個十全十美嘅靚餸！

十年回憶展

今日係端午節，先祝大家端午節快樂！

因為我地屋企做節關係，所以冇同大肥豬去街街，各自留係屋企等食飯！

媽咪預備好晒今晚D餸之後，見有時間，就捉左我地出去太古城行街街，主要幫LULU妹買波鞋啦！

可能係假期關係啦~~真係好多人呀！間波鞋店都迫滿晒人，我地都等左好耐先有人幫我地。不過...唔緊要，仲好呀~~可以等我地慢慢揀呀！

買完波鞋之後，我地見太古城中心有一個叫做十年回憶展，有幾個展覽都幾得意呀！我....當然又唔浪費依個影相嘅機會，同媽咪、LULU妹影左好幾張相啦~

哈哈~~我真係好鐘意影相呀，仲唔放過任何一個影相嘅機會呀！我都覺得我傻傻地呀！

行吓街有平野食

今日放工陪媽咪去銅鑼灣覆診，我地見完醫生之後，見仲有少少時間，所以就去宜家行吓啦！

行左一陣，媽咪就買左幾把較剪，因為媽咪話佢地D較剪好好用，所以次次都買幾把，收埋佢慢慢用，所以攪到屋企成日有好多較剪呀！

當我地走嘅時候，見到佢地有個小食部，佢地D野真係好抵到你唔信呀！一個大熱狗$5.00，爆谷$3.00，仲有雪糕都只係$2.00.....真係好抵呀！佢地D熱狗仲好香，見好多人都食，攪到我真係好想食呀，不過因為約左爸爸食飯先冇食呀！

最後我地都抵受唔住引誘，每人叫買左雪糕食啦！

支雪糕又香又滑，又有好濃牛奶味呀！真係好好味呀！(我好耐都冇食過雪糕啦！)仲好味過7仔同麥當當嗰D呀！最好就係真係好抵呀~~二蚊雞....真係好正呀！真係強力推介呀！

真係估唔到宜家除左買傢俱之外，都仲有又平又正野食呀！

又中左三個字

哈哈~~大肥豬中左六合彩呀！真係開心啦！

我覺得真係一個好開始嘅先兆呀，因為尋日先剛剛生日，生日後第一日就中到六合彩，雖然都只係中左三個字得$20，但我覺得獎金唔係太重要，個意頭好好呀！

我覺得依個就係好似好運嘅開始，希望大肥豬之後日日都可以順順利利，佢想做嘅野都可以順行完成。最重要就係好運要繼續係佢身邊呀！

 

父親節快樂

今日係父親節，我地都冇乜特別節目同爸爸慶祝，都係一家人就同爸爸去左北角花園餐廳食扒啦！(因為爸爸除左鐘意食中國菜之外，就係扒，其他野佢唔鐘意食呀！)

嘩~~佢D扒都幾大份，所以就叫左一個豬扒餐同媽咪兩份食呀！真係好大份，我地兩個都食唔晒呀！真係好飽呀！

不過唔知係唔係節日關係，佢地D職員個服務態度真係勁~~~差呀！

算啦，可能真係好多人影響啦，節日出街食飯就係咁啦！

遲送的媽咪禮物

雖然媽咪嘅生日係星期四嗰日，但我同大肥豬要係尋日先可以將份生日禮物送俾媽咪呀！

之前都提過，因為我地每年都會送生肖擺設俾佢，依家個金價真係好貴，金鋪職員話冇放太多公仔款式，要訂做呀！

原本媽咪都叫我地今年唔好送，留番D錢攪結婚嘅野。但我地都一致反對，因為冇理由為左自己野而唔送生日禮物嘛，所以我地都照樣訂做啦！

之前都有叫佢地盡趕係14號拎，不過到最後都係趕唔到...真係有少少唔開心，好在媽咪都唔介意。所以要等到尋日先有得拎呀！不過都係遲左一日，仲要係大肥豬生日嗰日送，都好似都有番少少意思！

依份就係我送俾媽咪，係唔係好得意呢？佢叫做『寶寶豬』，斤兩都唔輕呀~~不過唔緊要，最緊要就係媽咪鐘意嘛！見佢收到時個開心樣，都值呀！

越睇隻豬仔真係越覺得好得意呀！我仲幫佢影左一輯沙龍呀~~

依張係唔係影到好似豬八戒呢？個樣又好似奸奸地，但又笑得好開心....

睇吓佢個身~~~好肥呀！好大個肚DUM呀！

行吓MEGABOX

今日放假又冇乜特別野做，所以就同媽咪兩個人傻吓傻吓去行九龍灣個新商場 - MEGABOX。

一去到九龍灣地鐵站，就已經見到好多MEGABOX嘅宣傳，仲有免費穿梭巴士去呀，真係好似幾好呀...

可能我地都好早去啦，所以就唔係太多人行。不過...唔知係唔係仲係新啦，又好多鋪位都仲係裝修整，有D裝修味都幾濃呀！或者因為我有鼻敏感，所以對依D味都幾辛苦呀！

我地行左佢地個大型SHOP(唔記得左叫乜名)，真係好多野睇，好似一個大型超市，乜都有得買....仲有少少似外國FEEL呀~~行多一陣，都好似冇乜特別野睇，之後就走啦...

當我地行番去大堂時，我見到有兩隻BEAR BEAR(唔知佢叫乜名呀，有冇人可以話我知呢？)係度同人影相呀！我當然唔執輸，衝去同佢地影相啦！

哈哈~~今日依兩張相係我最好嘅收獲呀！好在我將上次信用咭換左部相機成日放入手袋度，如果唔係就冇左今日依個機會呀！

平淡但溫馨嘅生日

今日係大肥豬嘅生日呀！可能我要返工啦，所以都冇乜PLAN去邊度玩，加上我地又冇乜特別節目想做，所以都係行吓街食飯啦！

我之前已經送左一套型仔西裝俾佢，所以都冇再準備神秘禮物啦！不過...我知佢返工個袋已經爛左好耐，但又一直唔願買個新嘅，所以就襯今日依個生日機會，捉左佢去無印良品買袋啦！(因為佢之前都睇中左個袋，但成日唔捨得買。)

原本我係打算去食西餐，不過大肥豬知我唔係太鐘意食，所以就主動話去食上海嘢啦(因為我鐘意食小籠包)。我地去左時代廣場下面間上海店食野，又幾好味哦！特別係個小籠包，真係超好味呀！我地仲叫左雲吞雞湯，點知成碗湯都係我飲哂，大肥豬就只係食哂D餸。最後大肥豬見仲有少少湯，就幫我放晒入湯匙餵我飲埋佢呀~~個吓真係好突然同好SWEET呀！

今日好似係過得好平淡....但我地都覺得好開心呀！

有時平平淡淡都係一種幸福，最緊要大家都覺得開心，就已經足夠啦！

好冇品呀

尋晚因為玩得太開心，所以攪到好夜先訓得著....所以今朝就唔知醒，攪到我又要用最敗家嘅交通工具 - 搭的士返工啦！

因為我地屋企附近係冇的士站，所以就好自然係街口等車啦~~

話說有一部的士駛向我面前，我當然係揚手等佢停啦。個司機叔叔都好好人停左係我前少少，仲打開門等我上車。係依個時候，竟然有個男人跳左上車，仲好惡好大聲話：我等左好耐，依部車係我呀！之後...我就只好目送個衰人部的士走。不過....好在轉個頭就有車，我又可以冇大遲到，咁都冇咁激氣！

嘩~~聲到個衰人講吓....真係成個人傻左，唔識得俾反應。點解會有D咁嘅人呀！我等車時明明成條街都係得我一個，都唔知佢係邊度走出嚟，仲要咁大聲話人，依D人真係好冇品呀！

如果你真係有急事，同我講嘛，我就一定會讓呀！仲乜要靠惡呀！唔通依家真係要惡先得....

媽咪生日會

今日我地去左CEO NEWAY幫媽咪慶祝生日呀~~大家都玩得好開心，不過有一樣唔係太開心就係，原本我地係BOOK左六點，不過可能我地塞車，遲左去到，個職員就話二樓所有房都FULL左(因為自助餐SET左係二樓)，要將我地間房安排上三樓。我地覺得真係好唔方便，所以咪同個職員傾啦，點知個職員好似講到係我地遲到所以先冇二樓房，真係有少少掃興呀！

講番D野食先，上次都幾好款野食，但今次真係差好遠呀~~D野食真係又唔多款，又唔多出成日都係飯、麵...連蛋糕都冇乜，真係差左少少呀！可能唱K都唔係志在食野啦！不過今日真係好多人，都唔明白點解星期四都咁多人....

雖然係咁，大家都玩得好開心！我地都唱左好多歌，好在有好多新歌我都識歌，原來我都唔係太OUT，原來我地個個都識唱糖心首主題曲，真係笑都傻左呀！

我仲玩都連鞋都除埋，成個人都企係張梳化度，真係痴痴地呀！

到切蛋糕就個個都同媽咪一齊影相，我當然有份啦！

大合照~~睇吓我地個個都幾開心！

最後飲香檳...我當然同大肥豬影番張合照啦！

我地都玩到差唔多十一點先走呀~~

雖然唱K媽咪都唔係太適合佢玩(因為媽咪知我地個個都鐘意唱K，先提意去CEO)，不過今日見媽咪都玩得好開心，我都開心！

端午糭

哈哈~~未到端午節，學校都有糭派~

事關今日老細叫飯堂姐姐幫佢包D糭，送俾我地每人一隻，當過節哦~~真係攪笑呀！其實之前佢都有送過俾我地，不過嗰D就係大公司買，今次就叫人包。

感覺上佢好似慳皮左呀！不過.....咪當自家制新鮮D嘛！唔洗擔心有加料涵呀！

其實我都糭都真係冇乜興趣，因為我屋企都冇人識包，加上又唔係太鐘意食，所以每年都好少買糭呀！

我依隻係鹹水糭，即係點沙糖嗰D呢....今日LUNCH試食過少少，又真係幾好味呀！

不過...真係唔可以食太好呀~~因為點沙糖食，真係好肥呀！

師奶仔本色

六月對我嚟講，係一個好重要嘅月份，因為係我一生兩個最重要嘅人生日呀！就係...媽咪14號生日，大肥豬就係15號，真係幾橋呀！

唔止呀！佢地連個名都好似，大家都係姓吳，三個名中只係中間個字唔同，真係幾有緣呀！

我地往年都係一家人去酒樓食飯幫媽咪慶祝生日，但今年媽咪竟然話想去卡拉OK玩，仲話計起上嚟去K自助餐仲抵過去酒樓，所以我地就決定幫佢去CEO NEWAY慶祝啦！

我就剛剛打左訂位啦！原來生日嗰日係可以減一個人頭錢，仲有個蛋糕送呀~

於是我諗諗吓~~係哦，大肥豬都係跟住嗰日生日，唔知可唔可以減多個人頭錢同送多個蛋糕呢？所以我就再打電話去問吓....個職員話，因為我地有成10個人去，可以扣多一個人頭錢，不過蛋糕都只得一個。

嘩！聽到之後覺得好開心呀！因為可以慳多一個人頭錢，覺得好似好抵呀！

之後我將依個好消息話俾媽咪知，佢竟然笑我越來越似個師奶仔咁慳家呀！(唔知媽咪係讚我定彈我呢)

死啦.....我都覺得自己越來越似個師奶仔，成日都要計吓邊樣抵，有時睇中左D衫都會唔係好捨得去買(俾係以前就立即買左啦！)，真係唔知依D都可以話係好事呢？

病都古怪過人

今日放工媽咪陪左我去左睇醫生啦！

可能我放工早啦~所以完全唔洗等就可以入去見醫生，仲要唔洗十分鐘就見完，真係快呀~~

一入到去醫生就將我兩隻眼都左照右照，佢話我眼就冇事，只係眼皮發炎，好少事....但我同佢講話真係好痛，仲痛到連眼尾都開始痛。點知個醫生只係叫我唔好咁緊張，眼皮發炎係好少事，食藥就OK，不停叫我放鬆呀！之後我叫醫生睇埋我D頭痛同感冒啦！

其實我唔係緊張，只不過我都唔知眼皮發炎係乜，之前都未試過，所以問多一兩句啦！

話就話冇事，但佢竟然收左我$190，仲要得好少少藥....真係好貴呀！

不過，鬼叫個病都古怪過人喲！眼皮發炎????真係聽都未聽過呀！

病病病

今日都唔知仲乜，個頭同隻眼都鬼死咁痛，真係~~~攪到冇晒心機做野呀！

最痛都係我隻左眼角呀！成日都好似有D野『吉』住你，但我係鏡度左睇右睇，又好似冇野，只係紅左少少，睇唔到有D乜野，摸隻眼角又好似有粒野係入面呀~~好煩呀！

點解頭痛？可能尋日去睇相途中落大雨，我就淋濕左少少，之後又入到羅浮宮涼左成兩個幾鐘冷氣，可能就係咁，有少少中招啦！

不過，媽咪話可能我頭髮厚，依排又差唔多日日都扎馬尾，俾條馬尾扯住成個頭，所以就攪到頭痛啦！唔知係唔係真呢？但依家咁鬼熱，扎起D頭髮冇咁熱嘛！

唔理係邊樣攪到我頭痛，今晚真係要食粒感冒藥同早D訓先得啦！

羅浮宮睇相

今日終於都睇左羅浮宮嘅相版啦~~我地去睇相都陣容強大，媽咪、嘉汶表妹、契嫂一齊去...可能我地真係太多人，所以個SALES姐姐都係我地揀相時冇乜點理我地，等我地慢慢揀。

可能經過上一次新天地嘅經驗，我真係唔敢有太大期望呀！話雖如此，但終於都有少少緊張，希望可以影得靚嘛！

當我地睇到D相時第一個感覺就係點解D相板會係正方形？不過個SALES姐姐話係咁，所以冇理佢繼續揀相啦！

原本我最鐘意嘅第一個造型同大堂景，影出嚟個效果唔係咁好，所以都揀得唔係太多。到第二個造型都幾好，可能係園景，我鐘意依D感覺啦！到最第三個造型，依個係我影嗰時都唔係太鐘意，反而影左出嚟個效果就係最靚，所以就揀得最多。

最有驚喜就係個民族服裝，真係冇諗過影出嚟都幾好，我地仲揀左嚟做油畫呀~(因為覺得上次已經用左婚紗相做油畫，今次可以用特別少少呀！)

經過我地二小時四十五分嘅作戰，我地終於都要左52張相。唔知算唔算多啦~~

不過...原來有人陪睇相真係幾好呀！當我已經俾個SALES姐姐圍攻時，好在有嘉汶表妹幫我同個SALES一齊計，仲幫我計到最抵，真係叻女呀！仲有契嫂又不停叫佢送野！真係要唔該晒佢地呀！

依家又要等到九月先有得拎呀！

借左幾張相版出嚟，俾大家睇吓我地靚唔靚呀！雖然我SCAN得唔係太好，不過睇住先啦！

第一個造型↓

第二個造型↓

第三個造型↓

民族服裝↓

與小賢的約會

今日係我第一次真真正正約BLOG友仔見面，仲約左出嚟食LUNCH~~個主角就係~~小賢！

講真~~我同小賢都好似好有緣份呀！記得當我仲諗緊第二次婚紗相去邊間影時，咁我就冇意中去到小賢個BLOG睇佢D靚靚結婚相，就係咁我地就開始互相係對方個BLOG留言....之後又開始傾MSN啦！

開頭為因為大家同樣係今年結婚，所以有很多共同話題啦！之後傾傾吓，原來我地好多地方都好似呀~~又係SAMMI FANS、工作地方又差唔多、又成日都係太古城出沒......所以我地就越來越好傾，我都已經當左佢係我個好好嘅朋友，仲安排今日嘅約會呀！

雖然我地係第一次見面，但係就一D生疏嘅感覺都冇，仲有一個好似識左好耐，總之有一種好親切嘅感覺啦....小賢真係好好人，又好NICE，仲好瘦呀~(真係勁羨慕呀！)。我知佢尋日唔舒服，但都堅持今日個約會，真係好感動，好在今日見佢地好番好多，如果唔係我就會好內疚呀！

係成個過程入面，我地都傾左好多野，又傾計大家結婚野...小賢又教我整網頁，仲俾左佢個婚網個DEMO我參考，話如果我真係整唔到，佢可以幫我呀~~真係好開心呀！

最衰就係我要趕住番工，如果唔係仲有排傾呀！

係我番到公司先醒起唔記得左照番張合相呀~~真失敗！

不過...唔緊要，我諗我地一定會好快再有約會，到時真係要傾番餐飽同埋影番張靚相呀！(好在....我今日都勁多粒粒，影左出嚟都唔靚，等我下次靚靚先影啦~~)

水怪上身

今日唔知點解，都唔知係唔係水怪上身，成日都好想飲水，仲要係不停咁想飲嗰隻呀~~飲都自已都有d驚呀！

我成日大大話話飲左七、八支550ml嘅水(我平時都係飲兩支左右呀)，但飲極個口都好乾，好唔舒服呀！不停咁飲水，又要去多D廁所，真係好唔方便呀！

總之我今日成日都係廁所...茶水部....行來行去，好在今日老細出左去開會，如果唔係佢一定唔會我偷懶呀！

我都知飲多D水對身體係好，但如果好似我今日咁飲法 ，會唔會真係好似誇張左呢？

究竟我係唔係有病呀~~點解會咁嫁~

唔係好老實

之前係美容院JOIN左10次個PLAN，我今日都做到第七次啦~~點知個FACIAL姐姐今日係成個過程都不停係度SELL，又話依幾次都用左通淋巴方式幫我按摩...又話佢地入左部新通淋巴叫我試。我已經唔理佢，但仲不停係度SELL...真係好煩呀！攪到我想訓吓都唔得呀！

依樣都唔係最唔老實....

當我地做完FACIAL之後，要係我張會員咭，同佢地張FACIAL紀錄咭大家簽名作實。

點知...嗰個FACIAL姐姐一見我張會員咭之後，就話：好似上兩次都冇簽名哦~今次應該係最後一次啦！

聽完之後我就即刻對清楚所有日期係佢對我地兩個張LIST度(因為我係新JOIN，其實明眼一睇，就已經睇到大家都係簽左七個名啦！)，同佢對得好清楚之後，大家再確定做左幾多次！

我次次做都有係自己本記事簿MARK低係第幾次，所以我係知道自己做到幾多次，所以佢一講我真係打個特~~最大問題係，上次做完FACIAL之後，佢又係咁講，又係話張會員咭冇簽名。

一次就可以當係睇漏眼，但連續兩次~~佢係有心定有意記錯呢？

媽咪話佢唔老實，都唔知係唔係想扼我兩次FACIAL呀！

諗起真係嬲呀！

芒果糯米滋

尋日糖糖整左D芒果糯米滋返工俾我地食，好好味呀！

問左個食譜之後，原來真係好容易，D材料仲好簡單，所以係食完飯就開始我個依個糯米滋大計啦！

經過我係廚房閉關之後，終於都成功啦！

個買相又真係好似唔係太靚，但我已經好盡力啦，因為D糯米實在真係好痴手，同埋我又係第一次整呀！我又唔記得買嗰D紙碟仔一粒粒放好。(我下次一定會整好D啦！)

整左之後，好在爸爸同媽咪都話OK，個口感都似糯米滋，但就淡左少少，仲叫我下次整要落多D糖呀~~

哈哈~~今次都算成功啦！因為已經食得七七八八啦！真係開心~~

想整網頁

之前都冇諗過整婚網，因為我係一個電腦白痴，好驚唔識試，整網頁係一個PROJECT呀！

依幾日突然心思思想學人整番個，可能見到其他BLOG友仔都整得好靚，所以有個衝動去整啦！同埋我想將我D婚紗相放晒上網，到時再將個網址放埋係張帖度，等D朋友仔可以一次過睇晒我D靚相。同埋有一個好好嘅回憶嘛！

不過，原來整一個網頁真係唔容易，依幾日得糖糖同小賢教路，我都好似唔係好掂呀！...(係我自己蠢，唔係太明)，另外我又不停上網睇D教學區。

嘩~~~真係好難呀！睇左咁耐都唔係好明係點SET-UP，有D想放棄呀！

不過我會繼續努力學習，希望可以成功啦！

充滿父愛嘅大肥豬

話說個契大佬個仔仔~章章，係好怕羞同慢熱，每次都要WARM-UP一段時間，到差唔多走嘅時候先可以同我地玩。

不過唔知點解尋晚佢地上嚟食飯嘅時候，章章好快就好熱情起上嚟，仲同大肥豬玩呀！又抱起佢，又捉住佢，睇見都真係覺得攪笑！我見依個情景好好，所以就影低佢啦！睇吓佢地兩個都笑得幾開心！(章章平時都唔鐘意影相呀~影得咁正經相真係好難呀~)

食完飯，佢地又佢地傾計，我地就入左房玩。大肥豬同章章玩得都傻左呀！因為大肥豬訓左係我張床度，點知章章又禽左上大肥豬個身上面，不停係度『支』佢，後來..仲係度強吻大肥豬~~成個場面真係好好笑呀！

睇見大肥豬同章章玩得咁開心，我真係好難想像佢第日同自己個仔玩成點呀！

買結婚介指

仲有六個月嘅今日係乜日子......哈哈~就係我地個結婚嘅大日子啦！

不過...諗諗吓，時間真係好似過得好快，睇睇...好似仲有好多野未準備好，真係好怕會唔夠時間呀！

另外，自己又仲未有心理準備去做一個好老婆，始終要去照顧成個家嘅大小事務，真係要趁依半年好好學習，希望到時真正可以成為一個賢妻啦！

係今日都算一個重要日子，我地又做左一樣重要野啦~~~~~就係買左對結婚介指呀！

靚唔靚呢?我就覺得簡簡單單得嚟又有少少款，最好就係我同大肥豬都戴得好睇呀！

原本我地都冇PLAN今日買介指呀！只不過係見今日有時間，帶媽咪去佢相熟金鋪買佢嘅生日禮物！

我地每年都會買一個嗰年嘅生肖擺設俾佢，雖然依家個金價真係好貴，但我地都會堅持買呀！當我地睇完D金豬擺設同訂左個公仔之後(因為個金價好貴，所以要訂做呀！)，我地就見到有好D鑽石介指，開頭都係打算八卦一吓。

點知...大肥豬就睇中左幾對介指，試戴之後覺得都OK！我地見個價錢都OK，加上媽咪又幫親開，再有折扣，所以就決定買依對啦！

唔好睇佢唔係太公司出品呀，佢地有好長細嘅介紹~粒石幾多份...係乜料做，都好似幾專業呀！我上次去PN睇過，都冇咁詳細介紹呀！

因為我對介指要改細，所以要等下星期先有得拎呀！

佢地仲話幫我地刻埋名，個SALES姐姐仲話一般結婚係要係女裝刻大肥豬個名，男裝刻我個名。開頭我都覺得好娘，唔係太想。不過見大肥豬好似都好LIKE，同埋個姐姐話刻完即係代表『你心中有我，我心中有你』意思。

最後，都係照佢安排嚟刻名，依家諗起都好似好SWEET呀！

 

菠蘿炆排骨

今日又學左樣新菜式啦~~

登..登...登...登....就係依碟~~~~菠蘿炆排骨

媽咪話用罐頭菠蘿唔好，個味唔夠鮮甜，所以就用新鮮嘅菠蘿啦！媽咪仲專登出去APITA買呀！

不過原來煮新鮮菠蘿係比較麻煩，要係煮前浸糖水，等佢冇咁酸，煮出嚟甜D呀！

今次學依個新餸真係有少少難度，因為煮左一陣都覺得D排骨好似唔熟，我又不停抄...不停抄....點知，媽咪話排骨係要焗吓先得。好在....煮完之後都熟，不過好似有少少勒~~可能炆耐左少少啦！下次一定要睇緊D個時間先得！

真係好鐘意依個餸，因為我好鐘意食煮過嘅菠蘿。但唔知點解覺得生菠蘿唔好食，有少少澀味，但煮過嘅菠蘿就冇，仲好甜呀~~真係古怪啦！

救命~~好熱

救命~好熱呀！

今日學校舉行什麼無冷氣日，真係熱到想死！

全校都唔可以開冷氣，學生都可以話係課室開風扇...冇咁辛苦。但我地office又冇風扇，又只係得個窗仔，風都吹唔到入，就算打開晒門都扯唔到風入嚟，攪到好似好焗。加上今日個天氣又幾悶熱，所以我都真係有少少好似暈暈地呀！好在~~有同事自備左小風扇，佢地都好好，擺好個位等可以吹到我，如果唔係點算呀！

我已經好醒目今日著件薄薄地衫番工，但依家都感覺到個背脊都開始流汗，個身又笠痴痴...總之就係好唔舒服，周身唔自在啦！攪到做野都冇晒心機呀！

今日又要去做會議記錄，仲要放六點，真係有排捱，都唔知點算好啦！