十七個月啦

10 JANUARY 2012(TUE)

又過左一個月，小小豬已經踏入第17個月啦~

講返依個月嘅進展先，小小豬真係一級哨街豬嚟，只要同佢講話去街街，佢就已經識得自己去拎鞋仔襪仔咁坐定定等你幫佢著，著好之後就會即刻衝去門口等出開門，一出門口就會好開心咁奸笑。不過佢一出到街就好似傻豬仔咁，要自己行唔俾人拖住，仲要自己一支箭咁向前行，所以有時都真係唔知俾佢笑C定激C！

食嗰方面真係都唔太要擔心，因為小小豬出名係為食豬嚟，食嘢就唔洗勞氣，俾幾多佢都食，但飲奶奶就要勞氣啲，雖然每次都可以飲晒支奶，不過就要威迫利誘咁先飲晒，有時都真係幾激氣。

講嘢方面，隨左成日都讀住佢啲英文字之外，我地發覺依排小小豬開始模仿我地講嘢，間唔中聽到佢會跟住我地講嘢(當然係單字啦)，已經學得好快，所以我地都真係要係佢面前小心啲講嘢呀！

除此之外，小小豬仲好鐘意唱歌，成日都好有感情WOO WOO WOO。開頭都唔知佢係唱歌，後來當我地同佢一齊讀Oxford Path本兒歌書先知道佢咁投入咁係唱緊『搖小船(英文版)』。當我地一唱依首歌時，小小豬都會好深情咁跟住唱，所以攪到連小豬媽都識唱依首歌仔啦！

有叻叻又點會冇曳曳呀，小小豬有時會扭計發脾氣，又會好忟忟憎憎，直頭變成一個小魔怪咁。為防止小小豬變成大魔怪，所以我地狼心啲都要『打、罵、教』出齊，一定要教好佢，做一個好乖乖呀！