開心迪欣湖

1 JANUARY 2012(SUN)

今日天氣真係好好，唔太凍又有太陽，加上又係新嘅一年開始，當然唔可以只係留係屋企，所以要出去街街玩吓啦！

繼小小豬上次去山頂玩得好開心之後，所以我地都決定帶佢去啲有草地嘅地方玩吓，等佢可以走吓，就係咁我地決定左去迪欣湖玩啦！

依個小小豬真係好鐘意玩，一放佢落地就好開心咁周圍行啦~

大肥豬為小小豬準備左啲汽球，等小小豬可以帶住啲波波周圍玩。小小豬真係好鐘意啲汽球，揸住佢周圍行，仲整左好多古靈精怪樣，真係好攪笑呀~

睇吓我地玩得好開心呀~

係草地玩左一陣，我地就沿住個迪欣湖行吓~

不過，就係依個時間，小小豬啲電力已經冇晒，終於肯乖乖咁坐係BB車等我地推佢啦~

原本今日糖糖同小肥肥都約埋一齊去玩，不過因為佢地前一日佢地去倒數玩得好晏，加上糖糖又唔係好舒服，所以就冇同我地一齊去。不過唔緊要，因為迪欣湖真係一個唔錯嘅地方，我地去都好方便，所以一定有機會等小小豬同兩個姐姐一齊去玩呀！