海生行母親節星級烹飪班

3 MAY 2014(SAT)

今日真係好有口福，因為應公關姐姐邀請，參加左海生行舉辦嘅母親節星級烹飪班呀~

老賓講，海味依啲食物我真係冇乜研究，因為有啲咩想食都係會由小豬媽幫我地準備好晒，我地都只係等食就得啦！

今日其實都係一樣，因為有三位名廚為我地準備好豐富嘅~

其實今日負責同我地介紹海味同示範就係中間那位黎泰師傅，另外兩位師傳就負責幫我地準備好味嘅美食啦！

活動開始時候，先由黎泰師傅教我地點揀靚海味，由揀靚冬菇再講到鮑魚、魚翅、海參...等等。原來揀靚海味都真係要好留意佢地個原產地，因為唔同嘅產地，佢地生長環境唔同，分分鐘就會令到啲海味價格有好唔同呀~

黎泰師傅教我地揀完靚海味，就到今日個重點環節，就係即場為我地示範兩個菜式啦~

首先第一道就係- 媽媽滋潤花膠養顏湯，主要材料有花膠、元貝、紹菜膽、鮮鴨腎、杞子及上湯。黎師傅真係勁快手，見佢三幾吓功夫就已經整好左啦~

大家傾一陣之後，黎師傅又準備為我地示範第二道菜- 愛心海味三寶，材料仲豐富，因為有澳洲鮑魚、日本遼參、花膠筒~

雖然依個餸就好似複雜啲，不過黎師傅都係一樣，話咁快就煮好啦~

我地仲即場試食添，大家仲不停問黎師傅好多煮海味嘅貼士添~

哈哈哈..只係食少少又點會夠喉，我地嘅美食到啦！

依個花膠養顏湯真係好清甜，一啲都唔會好油，燉湯原來真係會好啲呀~

依個海味三寶都一樣好正，啲鮑魚、遼參同埋花膠筒都一樣係好爽口，估唔到只係簡單嘅蠔汁都已經煮得好好食呀~

其實今日黎師傅教我地煮依兩個餸，都係一啲簡單煮法就可以做到，完全係可以係屋企自己煮呀！

我依個BB班嘅廚師都可以搵個機會試吓整先，不過依日就唔知係幾時啦....哈哈哈！

 

More Information :
Facebook：https://www.facebook.com/pages/%E6%B5%B7%E7%94%9F%E8%A1%8C%E6%B5%B7%E7%94%A2%E9%A3%9F%E5%93%81%E6%9C%89%E9%99%90%E5%85%AC%E5%8F%B8-Hai-Sang-Hong-Marine-Foodstuffs-Ltd/346160832187838