芒果布甸

4 MAY 2014(SUN)

嘩哈哈...小小豬食緊啲咩，食到佢個樣咁浮誇呀~

唔唔唔...知唔係我整嘅芒果布甸啦！

其實我都係好鐘意食芒果布甸，仲記得最勁嗰次係去酒樓飲宴可以一次過食四碟，仲俾啲屋企人笑到依家，諗返上嚟都真係覺得自己食得好癲呀！

不過我就鐘意食，但好少自己整，星期五嗰集見肥媽三幾吓手腳就整到滑滑嘅芒果布甸，所以就即刻買齊材料整啦~

先將芒果切成粒粒~

準備兩包芒果啫喱粉~

加入暖水一杯半~

淡奶一杯~

最後加埋啲芒果粒拌勻~

然後倒入容器~

原來依個份量都可以整都好多杯呀~

其實放入雪櫃冷卻大約三個鐘左右，啲布甸就已經凝固可以食，所以尋晚我同大肥豬都已經每心食左一杯做夜宵啦~

真係超級好味，滑滑嘅布甸勁香芒果味，如果唔係因為太夜，怕肥唔敢食太多，我怕我真係會又嚟唔停口呀！

當然，有好嘢食又點少得小小豬呢？所以我就留左個BEAR BEAR芒果布甸今日同佢一齊食啦~

睇吓個為食小小豬食得幾開心~

哈哈...可能有我優良傳統，所以小小豬都不知幾鐘意食，成個BEAR BEAR芒果布甸唔洗十分鐘就已經俾我地三口子KO左啦！