小小豬嘅大驚喜

7 MARCH 2014(FRI)

小小豬今日應該係非常驚喜又開心，因為嘉汶表妹俾左個好大嘅驚喜佢，就係買左小小豬恨左好耐嘅火車同路軌呀~

小小豬一向都好鐘意火車/地鐵，所以每日放學都一定會要求搭地鐵，咁就可以睇係月台上睇地鐵，依個豬仔仲連啲宣傳海報都唔放過，一見到有地鐵蹤影都要企定定睇一陣呀！

嘉汶表妹知道小小豬好鐘意地鐵，所以佢話一見到依盒地鐵套裝時，即刻就諗起小小豬，所以就買左俾個百厭豬啦！不過話時話，我都係第一次見依SET玩具呀~

依個傻豬仔係我影完兩張相之後，充已經急不及待要拆嚟玩啦~

對住三部列車簡直係愛不釋手呀~

不過因為我要煮飯，所以砌路軌依個重任就交俾嘉汶表妹，估唔到平日好少玩依類型嘅玩具，都好快就砌好啦~

等左咁耐終於有自己嘅地鐵，小小豬緊係勁開心呀~

由於小豬媽屋企冇電芯，所以就冇得自動行，不過小小豬不停地沿住個路軌推地鐵，玩得都不知幾投入呀~

到大肥豬放工返到嚟，佢地兩父子就有另一件重要事做，就係幫個月台貼貼紙啦~

小小豬咁沈迷係地鐵上會唔會係一件壞事？我個人覺得只要佢識抽身，唔係一日24小時都地鐵上身咁，其實係可以接受。小朋友都係會有佢鐘意嘅嘢，有自己嘅主意，只要唔太過份，或者影響日常生活，我地仲乜要阻止呢！(放心...小小豬絕對冇地鐵上身咁，所以我完全唔驚)

小小豬真係一個開心嘅小朋友，因為身邊好多人都係好錫佢，希望佢慢慢長大嘅時候，亦會學懂利用內心體會，同樣愛錫返身邊鍚佢嘅所有人。