香橙雞翼

22 MARCH 2014(SAT)

繼之前整過檸檬雞翼之後，今日我又煮新嘢，都係用生果嚟煮嘅，依個就係香橙雞翼，個賣相都見得吓嗎...哈哈哈~

其實之前小豬媽都煮過香橙豬扒，我覺得個味都好正，見上次檸檬雞翼整得咁成功，所以就諗吓可唔可以將個煮法試嚟整雞翼，所以今日就嚟試吓啦！

材料好簡單，只需要買雞翼、橙同檸檬就得啦~

先雞翼洗淨瀝乾，加入老抽1湯匙、鹽半茶匙及花雕酒1茶匙拌勻醃1小時~

將兩個橙及半個檸檬搾汁備用~

先將雞翼煎至金黃色備用，依個階段都只係煎香個表層，所以唔洗煮得太熟呀~

先用蒜蓉爆香個鑊先~

之後加入雞翼炒..炒...炒~

加入小半碗將將個火較到去中火，就冚蓋焗住嚟煮一陣(約十分鐘，視乎煮到冇乜水，不過依個步驟先小心啲，唔好焗燶啲雞翼呀)~

倒入已準備好嘅橙及檸檬汁~

再加半茶匙糖煮一陣，直至雞翼完全熟透~

最後加入生粉水及橙片煮至個汁杰身~

一個又靚又好食嘅香橙雞翼就完成啦~

依個餸我覺得係好食，尤其係個汁，勁香橙味，用嚟撈飯都一流呀！其實依個餸係可以用支裝嘅橙汁嚟煮，咁就方便啲。不過我覺得用新鮮橙汁個味會好燶啲同好食啲嘛！

不過今日有一失敗點，唔知係唔係我醃雞翼時間唔多夠(我唔因為時間關係，醃唔夠一個鐘)，所以雞翼入面啲肉就好似唔多夠味，下次再煮一定要醃耐啲先得！

依個煮法除左可以用嚟煮雞翼之外，用嚟炒肉片或者牛扒都一樣可以，大家有興趣都可以試吓呀！