叻叻豬

12 MARCH 2014(WED)

小小豬终於做到叻叻豬，因為可以克服到飲奶樽仍個心癮，可以乖乖地用杯杯飲奶啦~

其實早係大半年前，我地都好想同小小豬戒奶樽，不過都係得個諗字，每日早晚我地都仍然好習慣地用奶樽開奶。

但小小豬都已經三歲半人仔，成日用奶樽係會對語音發展唔係咁好，所以我地真係要的起心肝同小小豬槭甩佢。

我自覺成個過程都有少少變態，不過為左小小豬，所以都真係要硬住頭去做。

開始摵甩行動之前約一星期，除左出街可以用水樽之外，平時係屋企都要小小豬用杯飲水，次數方面都幾密，同埋要次次清哂杯入面啲水，總之就要佢多用水杯啦！

其實成個過程我會好多謝腸胃炎嚟探小小豬，因為腸胃炎嗰幾日，小小豬又唔可以飲奶奶，就趁佢病好之後，渴左奶幾日，就係依個時間開始摵甩啦！

坦白講，開頭小小豬都唔多肯，真係可以話喊住飲。見佢邊飲邊喊邊叫媽咪個可憐樣，都有一刻心軟。不過心諗為左小小豬，真係要強硬，所以佢唔飲哂杯奶我都唔會睬佢。

小小豬都算幾大奶癮，加上又冇飲幾日，所以CC氣都會喊住同我飲哂。第一日都用左成大半個鐘先飲完，相同分量平日唔洗十分鐘就KO啦！

之後嗰幾日都係喊住飲，不過就抗拒程度明顯一日比一日少。或者小小豬明白一個道理，知道抗拒係冇用，所以乖乖就範...哈哈哈！

到左今日，小小豬终於係完全冇扭計情況下，開開心心咁飲奶啦~

雖然小小豬用杯飲奶都可能係算遲，有啲小朋友兩歲未夠就已經可以做到，不過每個小朋友發展唔同，唔可以作比較。

但係成個過程，小小豬都只係用左五日就可以乖乖開心地用杯飲奶，所以係我地心目中小小豬都已經係叻叻豬啦！