腐乳蒸雞

16 MARCH 2014(SUN)

今晚煮左個新餸，雖然係好簡單，不過就連小豬爸都話好食，真係大成功，好滿足呀！

依個簡單餸就係腐乳蒸雞~

其實腐乳雞我地都成日煮，通常都係用忟方法，不過用蒸依個方法整就未試過。

早排小豬媽買鑊送左肥媽本食譜書，見到依個餸，睇真係勁簡單又容易，所以又試吓煮啦！

方法真係勁簡單，絕對啱我依啲唔識煮嘢又要扮勁嘅師奶仔呀！

先將雞洗淨斬件，加入鹽1茶匙、生粉1茶匙、生抽1湯匙、老抽1湯匙、花雕酒1湯匙及腐乳5磚撈勻醃好。(可以的話醃半個鐘以上，咁會入味啲呀！)

之後隔水蒸15分鐘，落啲葱花，咁就食得啦！

今日煮飯煮得忙忙地，所以冇影低煮嘅過程，所以以純文字同大家分享先，等我下次再煮過時，再影底個過程，再同大家分享過啦！