窩心豬

12 MARCH 2014(WED)

我成日都話小小如果唔扭計發忟憎嘅時候，都係一個人見人愛嘅小朋友，一個傻傻的攪笑㨾又真係幾令人開心~

隨著小小豬越來越大個仔，佢就越來越識關心人，亦即係越來越識睇人微頭眼額(即係觀察力強左)。

今日亦都因為小小豬嘅觀察，令我好窩心，覺得小小豬又大個仔左啦！

事緣我接完小小豬放學之後，因為頭痛冇乜心情，所以都冇好熱情咁同佢邊行邊傾，唔知係唔係小小豬都覺得唔對路，所以放學全程都好合作仲勁乖。

就係返到屋企樓下，小小豬就同我講⋯⋯

豬：我想媽咪開心...媽咪唔開心呀！

我：唔係...媽咪頭痛唔舒服，所以咪唔精神！

豬：呀！(好大聲)唔得呀，要精神呀，你返屋企要即刻食藥，後瞓覺瞓醒就好返！

返到屋企，依個傻豬仔就即刻變身管家仔，鞋都唔除，就即刻帶我去拎藥食，要我即刻去去瞓覺，仲唔俾我去煮飯，真係俾佢笑C呀！

小小豬真係大個仔，開始懂得關心人，雖然只係簡單幾句話，加埋佢嘅行動又確實真係幾窩心，簡直係殺C我呀！

不過，請容許我貪心啲，希望小小豬唔好只係我唔舒服時先展示佢窩心一面，平日都做多啲，等我冧多啲啦！