掃貨...圖書

2 MARCH 2014(SUN)

原本今日有好節目，不過因為小小豬病左未好返，所以邊度都冇得去，乖乖留係屋企啦！

不過， 塞翁失馬焉知非福，就係因為今日我地全日都係屋企，到左夜晚就同小小豬去行吓商場等佢唔好成日困係屋企。就係咁，小小豬就大豐收，買左好多圖書呀~

原來三聯做緊特價，買圖書有八八折呀~

一向大肥豬對買圖書俾小小豬都唔會手軟，因為我地真係好想培養小小豬有一個好好嘅閱讀習慣，所以除左平日都成日去公共圖書館借啲唔同種類嘅圖書之外，都會買啲返屋企等小小豬擁有。等小小豬鐘意時就可以成日去圖書架，同時都培養吓佢個自學習慣。

今次我地買左七本圖書，三百蚊都唔洗，真係好抵呀~

其實依一SET圖書我都想買好耐，當然故事都係啲好簡單嘅，我地平日都已經成日講嘅故事，同埋細嗰一SET啲插圖真係唔係咁靚。

不過我睇中嘅就係因為包埋一隻CD~

CD入係以普通話講故事~

平日係屋企我地都成日同小小豬講故事，但由於小小豬嗰學校語境係以普通話為主，坦白講我地嘅普通話都真係有限公司，平日同小小豬溫習都係聽住學校派嘅兒歌CD。講故事又真係好少(好似係冇試過)以普通話嚟講，所以就想買啲普通話講故事嘅CD，咁等小小豬可以聽多啲嘛！

買完圖書就即刻要大肥豬講故事，睇佢一見到有咁多新圖書幾開心~

BED-TIME STORY開始啦~

雖然有左CD講故事，不過我地都係會由大肥豬講故事為主，增加親子時光嘛！

等大肥豬將CD轉一轉啲程式，慢慢咁係日常生活加添 CD STORY-TIME俾小小豬聽啦！