星期六好節目

15 MARCH 2014(SAT)

今日嘅節目其實都唔算豐富，不過對小小豬嚟講就應該係好新奇，因為去接DADDY放工呀！

當然接大肥豬放工就唔係啲咩新奇事，新奇係在於可以坐係位度攪攪陣，同有得玩電腦呀~

平日冇乜機會玩電腦嘅小小豬，一去到OFFICE，見到有電腦仲唔點會唔想玩。

難得大肥豬又批准，依隻豬仔仲唔大玩特玩。雖然都只係個Word度按吓啲數目字，不過小小豬都已經好開心，仲非常認真咁呀！(因為大肥豬話佢張枱太亂，只准我放一張相...哈哈)

玩左一陣，我地就去又一城入面餐廳開餐啦~

粟米蝦餅 - 送到來都仲係熱棘棘，入面有好多粟米，仲有好彈牙蝦肉，下次嚟一定要再食呀~

白汁菠菜三文魚長通粉 - 依個白汁係比較稀啲，但估佢唔到個味可以咁香。可能我都係鐘意食白汁，加埋啲三文魚，所以真係覺得好食。不過我都只係食左少少，因為俾小小豬食哂呀~

小小豬真係食得好滋味呀~

吉列豬扒飯 - 一向我都唔太鐘意食吉列豬扒，所以依個原本係打算叫俾小小豬食，不過隻豬仔掛住食長通粉，所以只係食左兩啖，之後就交哂俾大肥豬食。大肥豬話味道都OK，同外面食嗰啲都係差唔多，冇特別驚喜~

食飽飽就當然去行吓商場，又一城有咩啱小小豬行？咪就係玩具反斗城啦！

不過好在入嚟反斗城，因為小小豬又有新嘢玩，就係買到啱小小豬著嘅滾軸鞋。

依對鞋小小豬著都係大少少，不過好在反斗城職員可以俾我地試穿，試左之後又發現其實都幾OK，所以就買左佢啦~

其實早係幾個月前，大肥豬想俾小小豬玩滾軸鞋，話想等小小豬學吓平行。不過行過幾間反斗城都唔見有咁細對，終於今次係冇計劃之吓揾到！