冬菇排骨蒸飯

10 MARCH 2014(MON)

前日係屋企睇電視時，剛好見到電視節目教煮餸，我見材料簡單，又好似好易整咁，所以今日就試吓煮，依個新餸就係 - 冬菇排骨蒸飯，個賣相都好似呃得吓人呀~

其實煮法同材料都好簡單~

首先浸左啲冬菇至軟身，之後就切粗條狀備用~

排骨洗乾淨之後，用老抽、豆粉及少少水醃一醃~

之後就將冬菇絲都加入埋啲排骨中，由於係用蒸飯嘅方法，所以需要醃大約一個鐘，等啲冬菇排骨入味啲~

將白米洗凈備用~

依個時候就準備煮個湯底，用返之後量米嗰個杯，水同米嘅分量係相同，即係話如果你用兩個杯份量，水亦都要兩個杯分量，之後就加入半粒濃湯寶。其實係可以簡單啲用現成的雞湯，不過因為我唔鐘意雞湯，所以就利用濃湯寶自制啦~

等湯煮煲之後，就可以加入娃娃菜煮大約三分鐘~

之後就放入碟盤中~

再將米鋪係上面~

再加上兩個米杯分量嘅湯~

放入鑊中，用大火隔水約十分鐘(視乎米嘅份量同所需用嘅器皿決定時候)，直至白米吸收所有水份，開始乾水~

 之後將冬菇排骨放入飯上面，最好就用夾嘅方法，因為唔好將啲醃料汁都放埋入去，咁就唔好食啦~

繼續蒸十五分鐘，熄火再焗十分鐘，咁就完成啦~

簡簡單單又完成一個晚餐，記得要趁熱食，咁就真係非常好味啦！

今日依個簡單餸換嚟大肥豬一句『都有驚喜哦』，真係特別開心，覺得好有成功感呀！

其實依個蒸飯嘅做法可以配唔同種類嘅餸，好似冬菇雞、南瓜排骨又或者係肉餅都一樣可以，等我搵日再懶懶地嘅時候，又可以試吓整先得！