簡單快樂星期六

29 MARCH 2014(SAT)

一早就計劃左今日入海洋公園玩一轉，不過天氣唔係咁好，加上小小豬啲咳又未清晒，所以都係乖乖留係屋企休息一吓，之後等夜晚返小豬媽屋企食飯。

雖然冇得出街玩，不過留係屋企簡簡單單咁都過左一個開心嘅下午呀！

小小豬咁開心咪就係因為又有嘢食啦~

事緣小豬媽前幾日去針灸，之後路過花墟見到勁大粒嘅原粒栗子(基本上仲大粒過十蚊餅呀)，即刻買俾愛吃栗子嘅小小豬呀~

所以今日就可以同小小豬嚟個光波栗子，等食嘅小小豬幾心急~

之前都曾經分享過整光波栗子過程，如果大家有興趣，可以重溫此網誌(請按此)。

食得啦...真係又大粒又好味，新鮮出爐仲係好熱辣辣，不過依個為食豬已經急不及待要食啦~

其實分享小小豬嘅為食事件都係其次，主要都係分享佢兩父子嘅開心玩樂嘅一刻。

一向小小豬都係好痴大肥豬，總之有大肥豬係度，小小豬就可以唔要我都得。當然啦...因為我係做惡嗰個，對小小豬都嚴嚴地，但大肥豬都算係個YES DADDY，係唔太過份嘅情況下，真係同小小豬玩咩都得。

不過，真係唔怪得小小豬痴佢多啲，就係今日佢地兩父子嘅活動，我真係自問做唔到，所以就留俾佢地溫馨啦~

佢地兩父子都不知玩得幾開心，玩左空中飛人都大大話話有十幾下，玩到個傻豬仔笑到傻左，唔願落返地呀。真係要俾個叻大肥豬，玩左咁耐一啲都唔覺攰。

當大肥豬知道我偷影佢地時，係唔準我放上嚟，話佢好醜怪哦。不過，我又覺得兩父子玩得咁開心又投入，一啲都唔醜怪，仲係一個勁溫馨嘅場面添。