檸檬雞翼

7 MARCH 2014(FRI)

依排係FACEBOOK都俾朋友仔洗版，因為大家都整左Gigi姐嘅檸檬雞翼。

雖然我冇睇到個電話節目，不過小豬媽睇左，佢地話好易整。所以我又唔執輸，今日跟風煮埋一份啦！

哈哈哈...個賣相都唔錯呀~

材料都好簡單，雞中翼約二十隻， 片糖一塊半，厚厚地嘅薑八片(薑唔洗去皮呀)，一個檸檬切成八片，仲有生抽、老抽、蠔油各一湯匙~

首先就下油爆香薑片~

之後就落雞翼炒一陣，炒至變色及皮突起~

之後落檸檬及片糖炒一陣~

之後分別將生抽、老抽、蠔油加入炒..炒..炒~

炒混晒之後，將個火較到去中火，就冚蓋焗住嚟煮，記得千其唔好落水呀~

之後焗到個汁起泡泡，係焗煮嘅山過程中，最好炒幾次，以防燶底~

之後煮到個汁杰身，咁就完成啦~

一碟好味又簡單嘅檸檬雞翼就完成啦~

我覺得味道都唔錯，食落有啲似糖醋骨嘅味道，不過就冇"叮"一聲嘅驚喜。

不過，我好鐘意啲薑，係煮嘅過程就吸收左個漿汁，所以食落好好味呀！下次再煮時一定要落多啲薑呀！