小豬媽小豬爸的紀念日

4 MARCH 2014(TUE)

今日就係小豬爸同小豬媽結婚NNNN年紀念呀(當然唔話俾大家知係幾多年，因為幾多年就即係我幾多歲嘛..呵呵呵)！

我地一齊開開心心咁嚟個簡單嘅慶祝晚飯啦~

原本都PLAN好左入石澳食泰國嘢當係一個慶祝小活動，不過小小豬剛剛病好，小豬爸又開始作病，同埋又怕天氣太凍會冷親小豬媽，所以最後就決定改善計劃，去屋企附近嘅小菜館食啦~

依間雖然都開左有一陣日子，不過我都係第二次嚟食，打冷菜館當然要食吓啲潮州嘢先啦！

鹵水鵝 - 個味都算幾入味，不過就覺得唔夠熱呀~

韭菜蜆肉- 開頭都以為係我地平日食開嘅蜆肉，點知一上枱就真係打左個突，點解會係咁呀？原來依啲係潮州蜆肉，個味都係OK，送飯都幾好，不過可能同我預期嘅有少少唔同，所以感覺上好似唔鐘意咁呀~

魚湯海味浸波菜 - 都係啲大路餸，所以都冇乜問題，都係嗰句...如果熱啲上枱應該會好味啲~

香煎美極魚頭 - 依個唔錯，煎得幾香口得嚟又唔會太乾~

京都骨 - 個味都幾好，好多菠蘿...要加分呀~

椒鹽鮮魷 - 依個餸可以話係全晚至正嘅，香香脆脆，啲鮮魷又新鮮~

今晚就係咁簡簡單單同小豬媽小豬爸慶祝，其實食乜嘢都唔係重要，最重要就係大家開開心心嘛！

等天氣好返啲，我地先再約埋細路，一家人齊齊整整開開心心再食過飯！