迪士尼90週年慶典@The ONE

30 MARCH 2014(SUN)

出得嚟尖沙咀，當然一定要嚟The ONE，因為要去同MICKEY影相嘛~

今年係迪士尼90週年慶典，所以同好多唔同機構舉行活動嚟慶祝一番。除左7-11同BOSSINI之外，係The ONE嘅二樓中庭都有一個大型佈置，以迪士尼第一套黑白動畫「威利汽船」作場景。

作為迪迪尼FANS嘅我，當然一定要嚟影吓相啦！

場景內嘅公仔都係以黑白色為主，都幾特別呀~

除此之外，中間位置仲有華特迪士尼先生同金米奇呀~

場內都擺放左不同年代迪士尼嘅宣傳海報~

仲有好多迪士尼所推出嘅公仔呀~

雖然只係一個小小嘅地方，不過我覺得絕對要嚟參觀，展覽去到五月三日，各位同我一樣係迪迪尼嘅FANS，記得快啲嚟影相啦！

博物館半天遊

30 MARCH 2014(SUN)

今日天氣仍然唔多好，所以都唔敢諗去啲戶外地方，不過見下午都冇再落雨，都係時候要出去行吓玩吓，唔好成日困住係屋企嘛！

大家估吓我地去左邊~

哈哈哈...其實我地今日化身為文化人，去行博物館呀！

依張相係唔係好得意呢？其實係因為香港歷史博物館依家有一個以舊相片為題嘅專題展覽，為左配合個主題，所以係展覽廳前就可以俾我地扮影懷舊相，只要拎住張QR咭仔影依張相，咁就可以出左依啲懷舊用品，張相亦都可以經E-MAIL SEND返俾你~

個傻豬仔見到自己張相都不知幾興奮呀~

我地係香港歷史博物館都只係睇左依個小小嘅舊相片展覽，因為唔可以影相，所以唔可以同大家係度分享，不過啲相又真係幾有特色，由古代去到舊香港都有，如果大家對懷舊相片有興趣，都可以去參觀一吓呀！

其實香港歷史博物館都仲有一個大型展覽，不過因為我睇舊相片都悶親小小豬，所以我地都冇入去睇，留返下次先再行過，之後我地就轉戰科學館啦！

恐龍展原來下星期就結束，所以都好多人排隊入場打晒蛇餅，要排隊入去睇恐龍都一定要排兩個鐘以上。暫時小小豬對恐龍印象又唔太深，加上又咁多人，我當然唔排啦，之後就去睇常規館玩啦！

小小豬真係有一個好爸爸，每一樣小遊戲大肥豬都會好用心咁同小小豬解釋，等小小豬明白多啲呀~

當然有啲簡單遊戲就等小小豬自己探究啦~

其實以小小豬依個年紀，好多遊戲都唔識玩，不過我地都覺得可以俾佢嘗試，等佢接觸吓，見識多啲嘛。

可能因為恐龍展關係，科學館真係勁多人，所以玩好玩意都要排隊，有啲都要排成個鐘以上，真係誇張呀！

不過唔緊要，因為我地已經買左博物館年票，之後可以多啲時間去唔同嘅博物館再繼續玩呀！

話時話，原來依家博物館年票真係好抵，我地出家庭年票，四名成員嘅年票都只係$200，有海洋公園或者迪士尼年票都仲可以有八折，所以我地三口子連同LULU妹四個人出都只係$180，真係好抵玩呀！