一雞兩食之合掌瓜紅蘿蔔粟米雞湯

7 OCTOBER 2014(TUE)

今日煲左個靚湯俾小小豬飲，飲到個豬仔"Lam Lam脷"，依個靚湯就係合掌瓜紅蘿蔔粟米雞湯啦~

我成日都覺得啲雞湯係比較油膩，所以都比較少煲雞湯俾小小豬飲。

不過有一次我地去酒樓食晚宴時，小小豬飲過一次燉雞湯，當時佢個津津樂道個樣，比平時飲我嗰啲瘦肉湯真係滋味好多，好明顯依隻為食豬係好鐘意飲。就係依一次，我就打算有時候煲啲雞湯等小小豬滋味一返。

剛好小豬爸今日為我準備左一隻新鮮雞，不過我地三口子又點會食得晒呢？所以就決定嚟個一雞兩食，啲雞脾雞翼就留嚟煮餸，個雞殼就用嚟煲湯，咁就完完全全食晒隻新鮮雞，唔好浪費嘛！

買左啲合掌瓜、紅蘿蔔同粟米嚟煲靚湯啦~

粟米及紅蘿蔔去皮切件~

合掌瓜除核後切開一半，唔洗去皮的，因為連皮一齊煲係會潤好多呀~

首先將個雞殼汆水，咁煲嘅時候就唔會太多油啦~

水滾後將所有材料放入加入煲中~

先用大火煲半個鐘，之後再轉用慢火再煲將一個半鐘~

雖然未煲之前有將雞殼汆水，不過係煲嘅過程唔多唔少都會有雞油出現，所以係落鹽之前"避"咁啲雞油，咁就飲得更加健康啦~

最後跟個人喜好加鹽，咁就飲得啦~

依個小小豬真係好鐘意飲雞湯，食完一大碗飯之後，仲可以飲兩大碗湯，真係有幾鐘意...睇佢咁出力飲就知啦...哈哈哈！