健康院驗眼睛

20 OCTOBER 2014(MON)

已經有年多冇嚟健康院，今日小小豬又舊地重遊，因為四歲仔要去驗眼睛啦~

其實小小豬係八月生日，我應該係八月時帶佢嚟䨱診驗眼。一個大頭蝦媽咪直到八月尾先記得打電話去做登記，約好左之後又miss左個日子，所以攪到今日先可以去驗眼。

還記得之前嚟健康院都係一件苦事，因為等就要成個鐘，見姑娘就係幾分鐘，你都唔好話唔驚！

不過，唔知係咪只做驗眼關係，所以都唔係等太耐，量完體重身高後，都只係等左十五分鐘左右，真係從未如此快手過~

入到驗眼室，視光師分別幫小小豬檢查眼球、眼睛感光源同埋視力。初步睇小小豬都係一切正常，就連我地最擔心嘅斜視，視光師都話小小豬冇問題！

雖然我地平日都唔覺小小豬眼睛有啲咩毛病，加上佢又少接觸電視、手機嗰啲影響視力既嘢，所以我地都唔算太擔心。

既然健康院話小小豬一切正常，我都放心左一半。當然，我知道健康院嘅檢查都係比較簡單，所以大肥豬都話揾日帶小小豬去坊間大型啲嘅驗眼中心，徹底檢查吓眼睛，咁就可以十萬個安心啦！

始終眼睛係靈魂之窗，所以一定要小心啲先得嘛！