沙薑雞腳

9 OCTOBER 2014(THU)

話說早排同去酒樓飲茶時，大肥豬食左一隻沙薑雞腳之後就話叫我有時候整依個餸俾佢食。既然大肥豬開到聲，我都要扮一扮賢妻整俾佢食啦！

雖然係第一次整，不過都總算成功，唔止大肥豬鐘意，就連依個為食小小豬都食都津津有味呢~

我係網上搵食譜時，發覺原來整沙薑雞腳都有好幾個做法，花多眼亂都唔知跟邊個整好。最後，我都係決定跟個最易整嘅食譜嚟整啦！

材料包括：新鮮雞腳20隻、薑2片、雞粉3湯匙、胡椒粉及鹽各1茶匙、沙薑粉 1湯匙~

沙薑粉我係上次同大家提及嘅北角香料專賣店買(按此重溫)，原本我都只係打算買沙薑粉，不過店內店員姐姐知我係用嚟整沙薑雞腳，所以就叫我買埋乾沙薑片，話煮嘅時候加4片入去一齊煮，會入味好多。

既然有店員姐姐教路，所以我都買左1包乾沙薑片啦~

洗淨雞腳，用刀批走黃色鱗片，切去腳甲~

煲滾水，下雞腳汆水 1分鐘後撈起~

將雞腳放入煲，加水至蓋過雞腳面~

然後將所以調味材料加入煲內(薑2片、雞粉3湯匙、胡椒粉及鹽各1茶匙、沙薑粉 1湯匙、乾沙薑4片)~

用大火煮滾，轉中火冚蓋煮約 1小時至腍身~

撈起瀝乾後，一碟靚靚嘅沙薑雞腳就食得啦~

好在第一次煮都尚算成功，大肥豬都話好好食，仲一口氣食左有十隻。除左大肥豬之外，估唔到小小豬都鐘意食，佢食完碗飯之後問我可唔可以食雞腳，之後見佢密密食，食得不知幾滋味，仲食左兩隻添呀~

睇見佢地兩父子食得咁投入，真係好有滿足感，亦都係我一個動力去學整多啲唔同種類嘅嘢食。

為左佢地兩父子，我一定再繼續努力先得呀！