傻豬仔去釣魚

5 OCTOBER 2014(SUN)

原本今日都以為全日留係屋企冇地方去，突然間大肥豬問小小豬想唔想去釣魚，就係咁....我地四點左右就去左三家村碼頭，等小小豬學釣魚啦~

其實都唔可以話係突然間，因為依排大肥豬都有講『小貓釣魚』依個故事，依位慈父為左令小小豬聽得更入神，所以就搵返未陳年魚桿出嚟，俾小小豬實習一吓，仲話搵機會帶佢去學小貓咁釣魚添。既然有得去玩，我當然好樂意陪伴啦！

一去到碼頭，小小豬情緒都已經好高漲，不過首先要叫大肥豬教吓點用支魚桿先啦~

之後大肥豬就開始放魚絲同魚鉤，依個八卦豬都有幫手呀~

哈哈哈...美其名就話係幫手，其實就係攪攪陣，拎啲魚鉛嚟玩~

好啦....魚桿準備好啦！不過大肥豬唔係扣魚鉤，佢扣左個小水盆，仲話魚就應該捉唔到，放個盆落去就可以撈到啲魚，咁小小豬就會開心哦(真係俾依個慈父激C呀)~

雖然以大肥豬個定理都應該係撈唔到魚，不過見小小豬個開心又期待樣，我都有一刻希望係可以有一條魚~

最後...現實中當然係冇魚啦，不過小小豬都冇失望，仲不停話繼續繼續~

來來回回都好幾次，當然都係冇成績，之後我地就改用麵包嚟釣魚啦~

哈哈哈...用麵包嚟釣，小小豬好似仲開心哦~

玩到攰我就同小小豬去買雪糕食休息一陣~

我地邊食雪糕，邊睇大肥豬認真釣返一次魚啦~

我地大大話話都係碼頭逗留左兩個鐘，當然係乜都釣唔到啦！ 不過個傻仔玩得不知幾開心(我就不知幾擔心.....驚依個百厭豬跌落海呀)，仲話下星期又要嚟釣過，到時一定可以釣到兩條魚咁話哦！好...等我下次買啲靚蝦仔嚟做魚餌，一定可以幫小小豬達成願望呀！

其實去到我都係企埋一邊，一嚟我唔識釣魚，二嚟小小豬全程都痴到大肥實一實(因為魚桿係大肥豬手嘛...哈哈)，睇見佢兩父子咁溫馨，真係令我有啲羨慕添！