菊花雪梨茶

5 OCTOBER 2014(SUN)

繼早前我煲過雪梨蘋果茶之後(按此重溫)，今日又煲另一款好嗰秋天飲嘅菊花雪梨茶啦~

依排好似好賢妻良母咁成日都煲啲滋潤嘅涼茶俾兩位老闆飲，其實係有原因呀！

首先當然就係因為秋天就嚟，天氣又會開始變得好乾燥。唔好話啲皮膚，就連我地身體入面都好會燥燥地，所以趁依家初秋起時，打定好個底，咁到乾燥時都唔會太唔舒服，要由內靚到外嘛。

另一個原因就係我同大肥豬都算係唔多鐘意飲水嘅人，都係覺得淡淡口冇嚟味道，所以我地個電櫃內一定係會有啲檸檬茶...可樂依啲飲品。雖然係好飲，不過飲太多都會好似唔多健康，所以依家我就多煲啲涼茶放入雪櫃，咁就可以隨時都飲到，對身體又可以有益啲啦！

材料就需要四個雪梨、一兩菊花同少少冰糖~

菊花用清水泡開，之後過濾洗淨~

雪梨洗凈去皮，去核切成小塊~

大火將水煲開，然後加入菊花及雪梨，轉小火煲約30分鐘~

之後加入冰糖，再煲約15分鐘(冰糖分量亦都係因人口味而加減，由於我主要都係煲俾小小豬飲，所以分量就比較少)~

熄火後再焗多15分鐘，咁就大功告成啦~

待涼後就可以過濾入樽，就可以飲用啦。我地個人口味都係覺得雪凍係好飲啲啲呀~

雖然係因就小小豬關係我落冰糖分量係少左，不過我同大肥豬都覺得依個甜度都可以接受，唔會因為太甜而飲唔到菊花雪梨味，仲覺得幾夾添！

哈哈哈....小小豬都話佢鐘意飲菊花水多啲，叫我下次都煲依個俾佢飲呀！

菊花雪梨茶可以清肝明目，滋潤肺燥，極適合秋季飲用，老幼皆宜。但需提醒大家，菊花水雖好，也不是人人皆宜，有咽喉炎，胃不好的朋友都不要喝菊花茶。而脾胃虛寒、腹部冷痛和血虛者，也不能多吃梨。