雪梨薏米水

18 OCTOBER 2014(SAT)

今次因為一個小意外，所以我煲左既滋潤又袪濕，最好就係啱濕疹嘅小小豬飲，依個就係雪梨薏米水啦！

係夏天時嘅時候，我間中都有用薏米同檸檬一齊煲，估唔到今次用雪梨嚟煲薏米個味又唔錯哦~

小小豬都好鐘意飮我上次煲嘅雪梨菊花茶(按此重溫)，所以原本你打算煲多一次俾佢飲。

今次我仲信左藥材鋪嗰位大叔講，買左啲靚少少嘅胎菊嚟煲。點知當我浸洗菊花時，發現左好多細細粒嘅疑似虫虫嘅身體，係依個情況下當然唔好再繼續用依啲胎菊啦！

不過，我又已經答應左小小豬煲"甜甜"佢飲，所以就即刻上網睇吓可以改煲啲咩。終於俾我搵到依個雪梨薏米水嘅食譜，見都話係滋潤又袪濕，加上屋企又有薏米，所以就試吓煲嚟飲啦~

 四個雪梨洗淨後切粒去芯~

薏米約小半碗及蜜棗三粒，洗淨後浸約半小時~

煲內放入約3L凍水及加入雪梨~

滾水後放入薏米及蜜棗~

煲滾後轉用小火再煲多三十分鐘~

最後因應個人口味，如有需要可以加入少少冰糖調味。不過我就覺得其實唔依合份量個味都已經夠甜，加上我又係俾小小豬飲，所以我自己就冇加冰糖呀！

煲好後再焗多二十至三十分鐘~

待涼後就可以過濾入樽，就可以飲用啦~

今次係唔覺意情況下學識左煲左依個雪梨薏米水，估唔到都有驚喜，咁之後可以多煲啲，等兩位老闆可以有多啲唔同選擇呀！