五十個月大的小小豬

10 OCTOBER 2014(FRI)

說時遲那時快...真係唔覺唔覺小小豬已經踏入第五十個月大(即係四歲兩個月)啦~

其實小小豬整體上又真係唔多似一個四歲多嘅小朋友，曾經試過有一次係街上有途人問小小豬夠三歲未添。有時拍埋啲同齡嘅小朋友，小小豬真係明顯細粒好多。尤其係當我送小小豬返學時，見到啲同學仔真係比佢成熟啲又高大啲。

所以我都曾經有諗過點解小小豬仲係咁BB？有咩方法先可以令佢感覺大個仔啲？食啲咩先可以快高長大？真係滿腦子都係問題呀！

這邊箱其實我都好在意小小豬仲KEEP住個BB樣，感覺上好似比其他小朋友弱啲咁，雖然樣貌同學習能力係冇關係，但好想佢快啲大個啲。

但那邊箱又會覺得小朋友又有多啲童真唔係一件好事？起碼依家啲途人見到小小豬個BB樣都會加多兩錢肉緊讚佢可愛，同埋多人錫啲嘛！

另外，我地好認同朋友仔講過一句話：到佢大個左之後，唔再痴住你、唔再跟住你，到時你就會唔捨得佢大得咁快，好想佢變返做一個BB啦！

其實做媽咪嘅心態又真係好複雜，不過我都已經開始學懂唔理咁多，只要我知道小小豬係每一日都係有進步，每一日都過得開開心心，身體冇病冇痛，咁我就已經滿足啦！