初嘗智樂遊戲日

19 OCTOBER 2014(SUN)

智樂遊戲日成日都會係唔同地方舉行，不過今次小小豬都係第一次去玩呀~

之前都聽好多朋友仔介紹過智樂遊戲日，見佢地都好想帶小小豬去玩埋一份！前嗰幾次嘅舉行地點都係新界地區，所以帶唔到小小豬去玩，見今次係觀塘舉行，終於可以帶小小豬去見識吓啦！

不過，一個"論盡"嘅媽咪既然唔記得帶相機(真係失敗)，所以今次都只係簡單用電話嚟影相！

今次遊戲日係觀塘區其中一個足球場舉行，小小豬一踏入足球場，就已經俾啲小遊戲吸引住。

首先就玩足球場中心位置嘅小遊戲，同小朋友一齊砌吓路軌碌波波~

推吓車輪~

行吓平衡木路障~

仲有小小豬最鐘意玩嘅撞撞波呀~

小小豬見其他小朋友玩吹泡泡，佢又湊熱鬧去玩埋一份呀~

小小豬玩最後一個遊戲 - 彩虹傘真係玩到唔願走，玩完一次又一次，最後我地都排隊玩左四次先離開呀~

其實場內仲有幾個唔同種類嘅小遊戲同手工製作，我地仲撞到大仁一家三口添。

原本都打算一齊玩一陣，等小小豬可以跟哥哥玩吓。不過，因為我奶奶突然嚟左搵小小豬玩，為怕奶奶曬親，所以我地要早啲走，唔可以一齊玩，真係有少少可惜，希望好快就可以再約埋一齊去玩啦！

雖然今日玩得有少少唔盡慶(因為實在場地比較細但人又多，同埋太曬啦)，不過唔緊要，智樂遊戲日嚟緊好似有幾日都係維園同西九都會再有得玩，如果到時時間就到，都會帶小小豬再去玩過呀！