雙果雪梨茶

26 OCTOBER 2014(SAT)

依排啲雪梨真係勁抵，所以又買返幾個嚟煲吓涼茶。上網見朋友仔煲左個雙果雪梨茶，有助潤肺去燥，所以我又學吓煲俾大肥豬飲，等佢潤一潤兼去去燥先~

雙果係乜呢？咪就係羅漢果同無花果啦~

加埋雪梨，咁就可以開始煲啦~

先將四粒無花果洗淨，然後切半備用~

羅漢果一個洗淨壓碎，咁可以等個味可以煲時出味啲。由於我依個係細SIZE嘅羅漢果，所以我就用一整個，如果係大SIZE的話，用半個就可以啦~

四個雪梨洗淨後切粒去芯~

煲內放入約3L凍水，同時加入雪梨、無花果及羅漢果一齊煲~

待煲滾後，轉慢火煲兩小時~

熄火後再焗多三十分鐘~

待涼後就可以過濾入樽，就可以飲用啦~

其實因為保健關係，小豬爸基本上每日都會用羅漢果茶嚟當水飲。不過可能係只用羅漢果關係，我同大肥豬就覺得個味太甘，所以我地都好少飲。

估唔到今次加埋無花果同雪梨一齊煲，個味又真係即刻唔同晒，雖然都係有嗰一種甘味道，不過亦都飲到另一種甜味，兩者加埋又真係幾好飲哦！

由於個顏色都比較深，加上始終都有嗰一種甘味，所以小小豬都唔多願意飲。不過唔緊要，依個我都係主要煲俾大肥豬飲，等我下次再煲另一種"甜甜"俾小小豬飲啦！

羅漢果嘅用途都幾廣，可以清肺利咽、化痰止咳及潤腸通便，主治肺熱痰火咳嗽、咽喉炎、扁桃體炎等。不過，肺寒及外感咳嗽者就忌用，所以大家煲時都要留意一吓自己嘅體質先呀！