南瓜豬同你慶萬勝節

31 OCTOBER 2014(FRI)

今日係萬勝節，等小小豬化身成為南瓜豬同大家慶祝一吓啦~

其實小小豬學校一向都沒有萬勝節慶祝活動，所以我都冇打算做啲咩準備。點知今日一早起身，小小豬就同我講話英文老師叫佢地著Halloween衫返學校。

當我初初聽到時我都有一刻唔相信，因為K1時都冇依個安排，加上小小豬學校網頁上都冇依啲活動嘅資料，所以開頭我都冇打算著Halloween衫返學。

不過，小小豬不停同我講話老師係話要著，見佢個樣又咁認真，所以我最後都係決定信小小豬一次。因為我覺得既然佢咁肯定，都總係有一個原因，所以要對小小豬有信心先得呀！

臨急臨忙又點搵到衫呢？終於俾我搵到N年前買過嘅南瓜衫，當時係打算係Halloween著入去迪迪尼影相，不過當時唔啱身(貪心的媽咪買大了)，所以收埋一邊。

今日搵返嚟著又真係非常啱身哦，小小豬仲話自己係小南瓜，佢都不知幾鐘意呀~

老實講，以今日天氣著依個南瓜裝又真係熱左啲，原本我想返到學校先同小小豬換。點知小小豬換衫返學時兩話不說就自己著左件南瓜背心同南瓜帽，仲不停讚自己好靚，真係俾佢笑C呀！

佢著住套南瓜衫開心程度真係爆燈，一落到屋苑樓下仲行跳舞俾我睇添呀~

等巴士時興奮程度都仲未過，繼續係度唱歌跳舞，睇見個傻仔表演，睇到我都勁開心呀~

終於返到學校，可以開估小小豬有冇聽錯啦！其實沿途我都冇見到有小朋友係著住Halloween衫返學，所以我都有一刻係非常擔心，究竟我有冇信錯小小豬呢？小小豬會唔會俾老師罰呢？如果真係錯左，會唔會影響小小豬日後同我講返學校啲事呢？真係滿腦子疑問同擔心呀！

好在.....我一入課室都見到有幾位小朋友都係以Halloween打扮。之後即刻問老師，老師話學校係冇Halloween活動，不過英文老師又真係有同小朋友講過可以著Halloween衫，所以今次真係小小豬啱呀~

從依件小事嚟睇，小小豬原來上堂都有專心聽老師講過啲乜，又識同我講返老師嘅要求，真係比K1時有好大進步，我都已經好滿足啦！

雖然小小豬唔係一個好叻嘅小朋友，始終佢都仲仍自信心唔多足夠，不過繼續努力，相信KEEP住有進步就可以有更好嘅發揮啦！

MyBB試用小隊 - 合昌海產 美國野生鱷魚肉@川貝鱷魚肉無花果湯

30 OCTOBER 2014(THU)

由於之前係MyBB試用小隊抽中左兩包合昌海產嘅美國野生鱷魚，繼上次煲左個海底椰川貝鱷魚肉湯(按此重溫)大獲好評之後，今次再接再勵煲左川貝鱷魚肉無花果湯啦~

材料：鱷魚肉1包、瘦肉$25、川貝母3錢、南北杏1兩、陳皮1塊、無花果1兩~

先將無花果切開兩邊洗凈，南北杏及川貝洗凈，陳皮浸透去囊~

鱷魚肉洗淨，汆水備用~

煲內加入約3L水，然後加入先陳皮~

用大火將水煲滾後，將其餘的材料加入煲內用大火煲起~

之後再轉用小火煲約2小時~

最後因應個人口味，加入適量嘅鹽，就咁可以飲得啦~

我之前煲湯都只係識得落蜜棗，所以今次都係第一次利用無花果代替，估唔到個味道又真係唔錯，甜得嚟又清清地，我自己都連飲左好幾碗添！

小小豬都好鐘意飲依個湯，仲叫我聽日再煲俾佢飲呀~

趁依排小小豬咁鐘意飲湯水，實行要煲多啲俾佢飲先得，等佢可以吸取多啲唔同營養，儲多啲能量，做返隻肥豬仔先得！

 

More Information :
Website：http://www.hopcheong.hk/
Facebook：https://www.facebook.com/hopcheonghk?fref=ts

 

 

 

 

U Blogger X 亞坤銅鑼灣

28 OCTOBER 2014(MON)

早前係 U Blog 見到有 U Blogger X 亞坤銅鑼灣嘅試食活動，師奶仔嘅我當然唔執輸登記埋一份啦！

幸運地我抽中左，有份去試食啦~

其實之前都有聽過亞坤係新加坡好出名，所以當知道係尖沙咀分店時都好想去朝聖。不過見好多朋友仔都話總係排隊...排隊再排隊，所以都唔敢去試。

今次我兩點左右去到，可能已經過左個午巿，所以人流都唔算多。不過亦都可能係因為依間亞坤銅鑼灣有兩層關係，所以比較易揾位！

由於時間關係，我冇上第二層參觀，不過以第一層嚟睇，環境都幾舒服，座位都寬敞舒適~

由於是Blogger試食關係，所以有幾款套餐俾我地選擇。兩點幾唔太肚餓，所以我就Order左咖椰花生吐司餐啦~

落單係以自助形式，付款後會得到一隻白色飛碟，將飛碟放係枱面上的黑色圈圈，咁職員就會派送食物啦~

首先試食嘅就係半熟的，我一向都幾鐘意食太陽蛋，見佢地嘅食法都係差唔多，所以都有少少期待。不過一食入口，就變成為失敗，雖然蛋白及蛋黃都算幼滑，但唔知係唔係送到枱時都已經凍冰冰，所以食落都會覺得有少少腥嘅味。我想如果可以熱辣辣咁食，應該會好好多呀~

接住就到招牌熱奶茶，其實我係一個唔多"好"奶茶嘅人，所以我曾經問過可唔可以加錢換其他飲品。好在唔俾我咁做，因為依杯奶茶真係俾到驚喜我，飲第一口就已經覺得好香燶嘅茶味，而且仲覺得好滑，飲落喉嚨一啲澀都唔會有，所以真係唔錯~

咖椰花生吐司係由薄薄的麵包夾著花生醬，可能係即叫即制關係，所以都等左差唔多十分鐘先可以到。麵包烘得都非常鬆脆乾身，混合了充滿椰香的咖央醬及花生醬，味道都唔錯呀~

其實亞坤都仲有好多新加坡美食，有機會都要帶大肥豬嚟試吓，因為佢都係好鐘意飲奶茶之人，相信佢都一定會好鐘意杯招牌熱奶茶呀！

 

More Information :
Website：http://www.yakun.com.hk/
Facebook：https://www.facebook.com/yakunhk?fref=ts

 

 

雙果雪梨茶

26 OCTOBER 2014(SAT)

依排啲雪梨真係勁抵，所以又買返幾個嚟煲吓涼茶。上網見朋友仔煲左個雙果雪梨茶，有助潤肺去燥，所以我又學吓煲俾大肥豬飲，等佢潤一潤兼去去燥先~

雙果係乜呢？咪就係羅漢果同無花果啦~

加埋雪梨，咁就可以開始煲啦~

先將四粒無花果洗淨，然後切半備用~

羅漢果一個洗淨壓碎，咁可以等個味可以煲時出味啲。由於我依個係細SIZE嘅羅漢果，所以我就用一整個，如果係大SIZE的話，用半個就可以啦~

四個雪梨洗淨後切粒去芯~

煲內放入約3L凍水，同時加入雪梨、無花果及羅漢果一齊煲~

待煲滾後，轉慢火煲兩小時~

熄火後再焗多三十分鐘~

待涼後就可以過濾入樽，就可以飲用啦~

其實因為保健關係，小豬爸基本上每日都會用羅漢果茶嚟當水飲。不過可能係只用羅漢果關係，我同大肥豬就覺得個味太甘，所以我地都好少飲。

估唔到今次加埋無花果同雪梨一齊煲，個味又真係即刻唔同晒，雖然都係有嗰一種甘味道，不過亦都飲到另一種甜味，兩者加埋又真係幾好飲哦！

由於個顏色都比較深，加上始終都有嗰一種甘味，所以小小豬都唔多願意飲。不過唔緊要，依個我都係主要煲俾大肥豬飲，等我下次再煲另一種"甜甜"俾小小豬飲啦！

羅漢果嘅用途都幾廣，可以清肺利咽、化痰止咳及潤腸通便，主治肺熱痰火咳嗽、咽喉炎、扁桃體炎等。不過，肺寒及外感咳嗽者就忌用，所以大家煲時都要留意一吓自己嘅體質先呀！

MyBB試用小隊 - BIOGLAN佳思敏兒童營養補充品

24 OCTOBER 2014(FRI)

謝謝MyBB試用小隊，小小豬又可以化身為試食小專員，可以試食了澳洲銷量No.1兒童營養產品BIOGLAN嘅「兒童多種維他命+蔬菜軟糖」及「兒童Omega3+魚油軟糖」~

BIOGLAN佳思敏係由澳洲營養專家研配，由澳洲GMP藥廠研製，專為兩歲起小朋友提供優化腦部、骨骼、提升免疫力等重要營養，重點針對小朋友健康發展~

佳思敏兒童多種維他命+蔬菜軟糖~

蘊含源自胡蘿蔔、蕃茄、菠菜、紅甜菜及朝鮮薊的優質維他命，有助發展良好視力、鞏固骨骼及牙齒牙肉、改善皮膚及身體的健康，適合不喜愛吃蔬果的小朋友服用~

味道就鮮甜苺味，外表就好係包著砂糖嘅軟糖~

當然係小小豬未開始試食之前，我都會試食睇吓個味道如何。雖然外層有砂糖包住，但其實一啲都唔會覺得甜，而且咬落都煙煙韌韌，口感同味道都唔錯呀！

睇吓依位為食嘅試食小專員食得幾古惑，當然啦...有新嘢食佢緊係歡喜啦~

佳思敏兒童Omege 3+魚油軟糖~

蘊含豐富有益奧米加3魚油養份，專門幫助小朋友腦部發展，提升學習和加強兒童控制自我控制力，表現更出眾。連續一星期每日一粒軟糖，其所含的奧米加3份量相等於100克吞拿魚，特別適合不喜愛吃魚的小朋友服用~

一樽入面有三種口味(士多啤梨、檸檬和車厘子)，而且有三海洋動物造型，真係好得意呀~

味道方面，其實同維他命+蔬菜軟糖一樣，都係唔會太甜，食落仲有好香嘅果汁味添。

有咁得意嘅糖食，小小豬又點會唔鐘意食呢~

雖然以小小豬依個年紀，每日都應該每樽各食兩粒。不過依啲始終都係營養補充品，都不宜一日內食得太多，所以小小豬都係一食「兒童多種維他命+蔬菜軟糖」，一日食「兒童Omega3+魚油軟糖」，等佢每日可以吸收唔同嘅營養嘛！

 

More Information :
Website：http://kidssmart.com.hk/
Facebook：https://www.facebook.com/bioglanhk?fref=ts