至SWEET兩婆孫

6 AUGUST 2013(TUE)

今日我地返完理工暑假班之後，我地就去左陪小豬媽睇中醫，之後就一齊返我地屋企食晚飯。

正當我好努力係廚房準備緊今日晚餐嘅時候，外邊傳嚟好歡樂聲音，原來小小豬同小豬媽玩緊保齡球，玩到不知幾開心又勁溫馨添~

嘩..得咁高難道呀...哈哈哈~

睇相都未夠傳神，睇埋佢地玩緊條片，佢地兩婆孫真係幾時都係咁SWEET，真係令我有啲羨慕添~

不過，依個小小豬都真係特別跟小豬，雖然依家暑期見小豬媽嘅機會少左(以前星期一至五放學都會見到)，不過小小豬都仍然係成日好掛住小豬媽，係屋企玩緊嘅時間，都會突然諗起小豬媽，話要打電話俾小豬媽傾電話。

我成日都話係小小豬心目中小豬媽係排第一位，只要有小豬媽在場，依個仔都一定痴住小豬媽。

雖然我成日都話妒忌同羨慕，不過內心我其實係開心，始終小豬媽由小小豬出生第一日開始，就負責照顧佢，每日由朝到晚咁照顧，相信小小豬感受到小豬媽嘅愛先會同樣咁錫佢，所以我仲唔係開心到嚟唔切啦！