親子啫喱時間

5 AUGUST 2013(MON)

今日小小豬又有食神，睇吓佢食咁乜食到咁肉緊~

哈哈哈...咪就係出自小小豬親手整嘅好味啫喱啦！

事緣我早排係APITA見到有MICKEY矽膠小杯仔，可以整蛋糕、甜品、啫喱.....等。其實我都想買好耐，曾經見過整蛋糕嘅專門店有得賣，不過個質量又都冇麻麻地咁。係其實百貨公司都曾經見到有，不過又冇MICKEY款，所以當我見到嗰一刻真係完全唔洗考慮，即刻買嚟整俾小小豬，等佢見住MICKEY頭可以食得更開心~

剛好屋企有啫喱，見上次小小豬都好努力幫我整蕃石榴雪葩，所以就嚟個親子活動，同小小豬一齊整啫喱啦~

先倒啫喱粉~

之後就由我嚟放熱水~

小小豬攪溶佢先~

之後落冰粒~

古靈精怪攪攪攪~

完成後，先由我示範一次俾小小豬睇。到第二次就我陪住佢倒落小杯仔度~

之後嗰啲就全程係小小豬自己一手一腳咁做，仲做得非常專心呀~

放入雪櫃啦~

雪左一晚之後，今日終於有得食啦！不過唔知點知個模甩得唔係咁好，完全冇晒個MICKEY樣呀~

哈哈哈...唔知係唔係小小豬知道係自己整，佢食得特別開心，特別興奮呀~

之前小小豬都係一個冇乜耐性，又急性嘅仔仔，你叫佢乖乖咁依從你指示去做，都真係有啲困難。尤其當知道嗰啲係食得嘅時候，佢係會仲心急，所以之前真係唔多會同佢一齊整嘢食。

所以當小小豬好成功咁完成整個過程，我亦都有少少感動，同喜出望外。因為依啲小啫喱真係可以話係小小豬親手自己整，基本上除左落熱水個過程同埋示範左一次倒落杯仔係我做之外，其他全程都係小小豬自己做，仲要係好專心、留心同埋好溫柔咁去坐定定去做，所以真係唔可以唔俾個叻佢呀！