好耐都冇分享煮嘢食,趁今日煮左新嘢,所以同大家分享吓啦!
今日簡簡單單咁煮左白汁蜆肉火腿意粉配雞翼~
哈哈...係唔係好靚呢?剛好我又買左蟹子打算整沙津用,放埋落去真係勁靚,個賣相真係唔差呀!
唔止個賣相就好好,個味道仲唔錯添。次次煮意粉都俾大肥豬彈,唔係彈我啲意粉硬,就係話個個汁好似同啲配料唔多夾,所以攪到我都冇乜信心煮意粉。
不過,今次終於都激讚好味,仲話拍得住上次食過嘅Oliver super sandwiches啲意粉添,真係勁有成功感呢!
今次我改用左一個白汁磚~
開頭都好怕好難開,怕好難教個味道。點知原來係勁易,只要炒熟啲餸之後落一粒,再加水(濃度就隨你口味),咁就完成啦!
哈哈哈...又好味又易整,加上大肥豬又鐘意食,所以等我煮多啲先得!
同場加映:因為前幾日上姑奶屋企開大食會,食左少少沙津之後,攪到我突然好想食沙津,所以就整個蟹子生果沙津食吓先~
不過由於大肥豬係唔鐘意食沙津,所以我都唔係買左好多材料,所以都係簡單咁整個一人前。雖然材料少啲,不過我都覺得好好食啦!等我遲少少再買多啲唔同種類生果,返去小肥媽屋企再整過,到時個沙津一定仲好味呀!
**我的微博..關注吧**
沒有留言:
發佈留言