終於加入NDS行列

今日終於都擁有一部NDS啦~~

成日都15/16，好想買嚟玩，不過又怕好大洗錢...都考慮左好耐啦！加上次次講話想買，大肥豬都話唔好，所以都冇買到。

係前幾日LULU妹話想買時，我又多口問左大肥豬一次，今次佢竟然話俾我買呀！真係超乎我想像....

竟然佢話俾，所以今日放工就同大肥豬出去買我依部NDS啦~~~真係好開心呀！

終於都加入左NDS行列啦~~

大家有乜好GAME記得介紹俾我依個新丁呀！

初步完成婚網

成日都好想整個婚網，因為可以多一個地方記錄我地個婚禮！

其實好多野都已經係BLOG上記錄左，但因為都有好多我自己嘅私人事，好多野都唔係太方便俾自己嘅親人同朋友睇，所以都係要SET番一個婚網俾親戚朋友睇，好似好D嘛！

不過一向唔叻整網頁嘅小肥豬，話整話整都好似整唔到，因為都唔知點去SET-UP。原本都有打算用 ESD個版面整，不過佢地又唔可以放太多相上去…攪左好耐都唔成功，真係有少少失望呀！

當我想放棄嘅時候，就收到ARWIN嘅好介紹啦~

尋晚ARWIN介紹左一個新關係籌備婚禮嘅網頁俾我，我見有一個類似BLOG嘅地方就去睇下。整整吓，我又UP晒兩輯婚紗相上去，咁就俾我整左一個出屬於自己嘅婚網出嚟啦！

雖然個網頁原意係以一個BLOG形式，不過我唔理啦，當左係自己個婚網呀！

依家可以將依個俾D個網址俾各位親戚朋友睇啦~真係開心呀！

依家雖然仲係好簡陋，大家有時間都去參觀下啦！記得開埋喇叭，有正歌聽呀！

俾D意見我呀~

記得要留埋言俾我呀~

http://www.darizi.com/hk/blog/yanyan_hinghing/

 

中左都唔知

我地一向都有買六合彩嘅習慣，因為希望有朝一日可以大到獎嘛！為免唔記得左買，所以我地都習慣一次過買三十期。我嗰條號碼就係我結婚日子嚟呀~~

今日放工大肥豬話我知我地D六合彩已經到期，所以大肥豬路過就幫我買新三十期啦！

頭先路過馬會，見冇乜人，咁就貪得意入去CHECK吓張飛啦，到期望唔大啦！因為剛剛過左嗰三十期我都有對過吓，唔覺得有中過！

點知當我俾左張飛個職員入機CHECK時，嗰個職員姊姊就俾左$40我。

原來我都中左2次3個字呀！

真係...中左獎都唔知呀！好在我貪得意去吓CHECK，如果唔係都MISS左啦~~

我將依$40換左2張電腦飛，希望好幸可以繼續KEEP住啦！

作病中

今日一返工就去左幫老師做會議記錄，開頭都好地地，只係個人完全唔知做緊乜係度遊雲，可能未訓醒啦！成個會都唔知自己寫左D乜，唉....最衰個會又開得好耐，都唔知算，有排作番篇記錄啦！

不過我一路寫野，就唔知點解越嚟越覺得唔舒服，感覺由心凍出嚟，仲起晒雞皮呀！我估係把風扇係正我頭上面吹，仲要個風都幾大呀~~可能就係咁吹病左啦！

唉~~所以成個下午都唔係好舒服，D鼻水不停咁流.....真係好慘！

放工返屋企就跳左上床訓，訓到食飯先起身，依家都呆吓呆吓。

今晚真係要食粒感冒藥早D訓先得啦！

見到鄭嘉穎

其實尋日都仲有一件開心事發生左呀~~

當大肥豬仲未嚟到送蛋糕時，佢就SEND左一個SMS俾我，入面係一張鄭嘉穎嘅相呀~~

我覺得好奇怪，咁就即刻打俾佢問吓啦！原來嘉穎係佢屋企附近拍劇呀！

佢話當行去搭車時，見到嘉穎自己一個係度睇緊劇本，佢見四周都冇人，就行左去同嘉穎影左依張相，仲傾左兩句同握手呀！大肥豬話因為四周冇人，所以唔可以合照，唯有幫佢影一張相俾我啦！

好羨慕呀！我都真係未見過明星，握手仲更加未試過啦！

不過真係要讚吓大肥豬呀，因為佢竟然會走埋去同嘉穎講野，仲要影埋相....怕羞嘅佢平時都唔會做依樣野，可能見我係生日，想俾一個驚喜我啦！因為佢都知我係鐘意嘉穎呀！如果係其他明星，我估佢都唔會行過去呀！所以都真係好開心呀！

如果我當時在場就好啦~~咁我就可以同嘉穎合照啦！不過依家有一張獨家照，都好滿足啦~

開心嘅生日

今年生日真係好開心呀~~

首先就係當昨晚剛剛過左十二點時，有兩位朋友仔係MSN同我講生日快樂(仲早過大肥豬同我講呀)~~真係好多謝佢地兩位，佢地真係好有我心呀！

今朝一早起身，大肥豬就拎左一個蛋糕仔俾我啦！不過因為趕住去街街，所以留番去完街街先食啦~~

依條腳手鏈就係大肥豬送俾我嘅生日禮物啦！

點解會係腳鏈？因為我之前曾經睇過一個電視節目，話戴腳鏈係可以有助聚財，咁我就同大肥豬講啦！咁就有左依份禮物啦！不過我戴都係為左幫佢聚財呀！(哈哈！)

我地今日主要節目就係去山頂蠟像館，我一直都好想去，不過一路都冇藉口去，所以今日就當係一個生日節目啦！我地同埋LULU妹一齊去，因為佢好想去同TWINS影相呀！我覺得到唔緊要，因為生日唔一定要過二人世界，最緊要就係大家一齊開心嘛！

當我地一入到蠟像館，就不停咁同D明星影相啦！不過都係我同LULU妹影多，因為大肥豬話唔想同D蠟像影！

係蠟像館入面有好多唔同國藉嘅明星，我地都係鐘意同我識嘅明星影，所以好多都係香港明星呀！不過有好多明星都唔係太似樣，都係得幾個似呀~~但我地都唔理，影晒先算啦！我同LULU妹都好勁咁影左百幾張相呀！

我覺得最似就係依幾個呀~~

黎明~~不過好似黑左少少！


基仔~~我覺得最似就係佢，不過最衰KUBI唔可以拎起嚟影！

寶珠組~~真係幾似呀，等我扮埋大戲造手先！

千嬅~~一般似啦，佢會無端端發出D笑聲，唔知都幾驚呀！

衛蘭~~最新蠟像，不過都係麻麻地似呀！

行完蠟像館之後，行左山頂一陣，就走啦！

之後就去左北角食日本野，講真間野又真係麻麻，不過好在唔多人，感覺都幾好呀~~

大家食飽飽之後，就番屋企食蛋糕祝願啦~

我今年嘅願望就係希望大肥豬心入面嗰兩個問題可以好快解決，佢可以開開心心！因為佢好就即係我好嘛！

今年生日真係好開心...好開心.....好開心呀！真係覺得好有好多人錫呀！有一班好好嘅朋友，有一班好好嘅同事，又有好好嘅屋企人，當然仲有好錫我嘅大肥豬....我真係覺得好幸福呀！

有羅浮宮靚相

今日放工就去左旺角拎番我SCAN左嘅羅浮宮依輯靚靚婚紗相啦~

今次去左旺角嗰間鋪頭SCAN，真係好抵呀！不過我覺得佢地D邊位整得唔係太好，要自己慢慢整番好D位，不過唔緊要啦~~可以係整嘅過程入面睇下自己個靚靚樣呀！

真係越睇越鐘意依輯相呀~~

最鐘意依個中國造型呀！

兩次影依D民族服裝都好有驚喜，上次宮廷FEEL已經好鐘意，今次個中國FEEL就仲喜愛！

大家有興趣就可以去

驚喜生日會

雖然仲有幾日先到小肥豬嘅生日，不過今日一班同事俾左個驚喜生日會，真係冇諗過佢地會提早同我慶祝，好開心呀~~

當佢地拎個蛋糕俾我時，真係好驚喜同感動呀，攪到我有少少眼濕濕呀！(睇吓我個樣真係笑到見牙唔見眼)

睇吓我個蛋糕幾靚靚~

佢地都送左好多禮物俾我呀~~真係收獲豐富！樣樣都好鐘意呀！

首先有一張好靚靚嘅生日咭，仲要係我至愛玉桂狗呀！

佢地仲送左個好可愛嘅玉桂狗鐘俾我呀，真係好得意呀！雖然有人話送鐘唔好，不過我地新潮人冇有怕，個同事仲話左一句好有意思嘅話：依個係代表從一而終呀！

另外同事B小姐佢送左係個狗仔雪豆咕咕俾我呀~真係好軟林林，好好抱呀！隻狗仔樣好攪笑呀！

另外，有一位已經退休嘅工友姐姐，佢托同事送左一份韓國手信俾我呀！因為佢知我差唔多就嚟生日，所以送多左一個散紙包俾我呀~

仲有呀~~我老細之前去左旅行，佢買左一個琥珀老鼠仔俾我做手信呀~~

今日真係好開心呀~~仲收獲好豐富呀！真係好多謝咁多位同事呀~~多謝你地俾左個驚喜生日會我呀！

同場加映：

今日一返到工就同老細講請假去攪排期問題，唔知佢係唔係一早知道我要結婚呢？所以我一開口講時，佢都已經笑笑口，仲恭喜我呀~~真係放下心頭大石啦！

今日真係超開心呀~~

拎左羅浮宮相簿

今日放工就去左羅浮宮拎番我地D靚相啦~~

今日都只係拎左相簿同底片呀，原本仲有一張油畫，不過佢地個框做錯左，所以要再做過，唯有再等兩個星期先再有得拎啦！(不過真係要讚吓佢地個服務態度，當發現有問題時，嗰位版部同事真係好有耐心咁幫我解決個問題！)

一邊慢慢睇相簿，就發覺佢地真係整得好好呀~(比新天地整得好好多呀！)佢地除左大相簿整得好之外，連細相簿都有執過下。

當我地拎完晒D相之後，就即刻去左旺角SCAN底片，真係好，聽日就有得拎，真快手啦！所以大家就要等多一日先有我嘅靚靚相睇啦~

PS：
車車~~唔該晒你呀！
糖糖~~你星期一就要開工幫我整MV啦！哈哈

悠長假期結束

話咁快我個悠長假期就結束啦，聽日就要回歸現實(包括我D指甲油，冇得塗啦！)，要一早起身返工啦~真係有D唔習慣呀！

真係好唔捨得呀~~~好唔捨得晚晚可以睇埋妙手仁心先訓，朝朝可以訓到好晏先起身，鐘意幾時去行街街都得。依D開心生活又真係幾好呀~~哈哈！

唔知幾時再可以有悠長假期呢？結婚都係晒最多請三日假左右，我諗最快都要等出年暑假啦~~

唉....

聽日一返到工就要同老細請假(9月3日去交結婚通知書呀)。今日叫糖糖幫我留意老細心情，好在都幾好，希望明天請假可以順順利利~~

終於成功整到

之前都曾經整過好多次曲奇餅，不過次次都唔成功！一係就濃晒唔知變左乜形狀，再唔係就完全唔鬆化....好難食呀~

今日見有時間，就再試吓整啦！基本上我都完全冇信心可以整到！不過打算整俾一個好鐘意食曲奇嘅朋友仔食，又可以幫佢試下個食譜得唔得嘛！

整整吓，又好似得得地哦，係唧餅時有少少難，時大時細咁！有D唔知唧到似乜，又唔要得啦！所以整左好多麵粉漿，但有整得出嚟都唔係太多呀！

但今次焗出嚟又幾OK哦~~真係有少少成功感呀！不過有幾粒就好鬼濃，我請左籮叔叔食左啦！

等凍左少少，試左一粒...又幾好味哦~~不過就好似有少少唔夠鬆，下次一定會更好味！

哈哈！終於都成功左啦！不過唔知係唔係撞手神先整到呢？

落實個籌啦

今日好乖咁去左大肥豬公司樓下等佢，打算俾個意外驚喜佢，就係陪佢食LUNCH！

不過...原來由地鐵站行到去佢公司條路都幾甘，加上我又著左一對三吋高嘅鞋仔...真係都幾辛苦呀！不過為左俾個驚喜大肥豬，唔緊要啦！真係廿四孝女朋友啦！(唔知醜係度讚自己！)

食完LUNCH，我就去左金鐘政府婚姻登記辦事處交我地個身份證副本啦！因為要交副本俾佢地落實個籌呀！

原本可以FAX去呀，我真係好驚佢地話收唔到我地D身份證副本，咁就唔俾個籌我地，到時都唔知算....所以都係親身交去安全D！(我見我放假又冇野做，當係其中一個節目啦！)

交完之後個職員就再一次叫我9月3日帶埋$305去揀時間。係臨走時個職員又好攪笑咁叫我帶埋雙方父母嘅中英文名去做登記。真係攪笑呀~我地當然知道自己嘅父母名啦，不過佢咁都係出於一番好意！

真係好心急呀！希望快D可以揀到時間，咁就真係可以放心晒啦！之後又可以去整帖啦！

拎左個籌啦

由尋晚開始，就已經好緊張呀~~~因為要拎籌啦！

緊張係因為CHECK過原本紅棉路係得23個註冊時間，但又係好多人都會選擇去嗰度註冊哦，你都唔好話唔擔心呀！

尋晚都訓得唔係太好，成晚都好驚訓過頭，唔知醒.....終於係七點幾就醒左，坐係電腦前面等夠鐘啦！

終於等都八點啦~~不過一入去就話我D資料已有人登記左，一問之下，原來大肥豬已經登記緊啦！

終於都係佢叻番一次啦！佢拎左一個好好嘅籌呀！

遞交結婚通知書的籌號              11
選擇舉行婚禮時段的次序           1

聽到真係好開心呀~~~雖然就係第11籌，不過揀時間可以係第一呀，真係放心左大半啦！(另外嗰一半等我揀埋時間就可以放心晒啦！)

係度真係要好多謝小賢、小M同車車呀！佢地有份幫我手拎籌呀！佢地真係好有心呀~~真係好感激佢地呀！

依家就要等9月3日去揀埋時間，就可以放心晒啦！

不過又有一個問題出現啦！因為9月3日係開學日呀！都幾難請假呀，所以我就要被迫早D同我老細講我要結婚去交擬結婚通知書同去揀時間，希望佢可以俾我請半日假，去辨手續啦！

學人打麻雀

今日去左同大肥豬屋企人飲茶，飲完茶見冇乜地方去，就上左大肥豬家姐屋企坐吓啦！

原本都只係打算坐吓，點知大肥豬阿嫂就建議打吓麻雀仔，仲叫我落場『鄧』腳呀！但由於我都唔係太識打麻雀，完全唔識計幾多番同食乜，只係識打三隻一樣嗰種。不過佢地為左就我都話打細D，所以都當陪佢地玩吓啦！加上大肥豬又會陪住我打，冇咁驚呀！

點知都唔知乜事...由三點鐘開始打，打左成兩個鐘，一次都冇食個糊，仲要包人地一鋪(不過我唔知點解要包，佢地叫我俾錢就俾啦！)

真係超級黑仔王呀！見情況唔得啦，輸左幾鋪就俾番個大肥豬打嚟，都係睇人打，同D小朋友玩好D呀！

之後大肥豬又話要休息一吓，所以就又到番我打，係依個時候，終於都食左我全日嘅唯一一鋪啦，個心真係勁開心呀！

全日都輸左二百幾蚊呀！(好慘呀~~好傷呀！)但當一家人玩吓，冇乜所謂啦！我都知道佢地已經就住我嚟打啦！大家開心左一個下午都幾好呀！

原來打麻雀都幾頭痛呀，我都唔係太鐘意玩依D玩意呀！

我都收到電話

之前睇wedding more，見佢地有現代經典攝影套餐抽獎哦，咁就貪得意寄信去抽吓囉！因為佢地個南瓜車景真係好靚呀，如果有得免費影就好啦！

佢地尋日已經有打電話俾小賢問資料時，知道佢可以再進入下一階段，都好鄧佢開心。

不過同時就諗我一定冇，我連第一階段都抽唔到啦！不過唔緊要啦~~因為一向我都完全冇抽獎運，大大小小嘅抽獎同遊戲，都一定冇我份，所以都唔期望太大啦！心諗都係用$1.40郵票抽個希望，抽唔到都冇乜損失呀！

點知今朝俾一個電話嘈醒左，佢話係wedding more嘅職員，問左我幾個問題同婚期之後，又話會將D資料pass去另一個部門，如果抽到就會再有專人打俾我。

哈哈....今日真係幾一起身就有好消息，雖然未真係抽到，但都已經好開心啦！

抽到個機會我都知好微，依家起碼知道我可以入到第二階段呀！証明我開始有番少少運啦！希望嚟緊可以越嚟越好運啦！

抽唔抽到都依輯結婚相唔係最重要，(當然抽到一定好開心啦！最好同小賢一齊抽到，可以約埋一齊去影靚靚相。)

我最想就係抽嘅，就係最想要嘅一個揀樓機會，希望可以有一個好號碼，可以揀都合心水嘅靚樓啦。

 

我的嫁妝~PART 2

今日收到我第二份嫁妝啦！係唔係好得意呢？

依條豬豬鏈係小豬爸送俾我呀！真係好開心呀~~~

話說由我未決定結婚嘅時間，小豬爸已經話一定會買條豬豬鏈俾我出門。(因為小豬爸話好得意，佢鐘意左好耐啦！次次行過金鋪佢都話好得意呀！)

到決定左結婚，佢都話會買俾我，我開頭都以為佢都係講吓！點知...小豬爸話見今日金價跌左少少，所以就同小豬媽入左金鋪買依條豬豬鏈啦！

依家個心情真係唔知點形容，佢地真係好錫我呀~~

富貴下午茶

今日同左小豬媽去金域假日酒店食Haagen-Dazs Tea Buffet。原本以為平日會冇咁多人，點知都有好多人，特別係小朋友，可能係放暑假關係啦！

我地都食左好多野呀，又壽司、刺身、冷盤、熱盤同甜品...真係都食左好多野呀！

食完一輪飽肚野之後，終於都到主角出場啦~~~我地就去左自助雪糕站食大杯雪糕啦！

我都覺得自己好叻呀！一個雪糕杯可以整晒六種唔同味落去！好耐都冇食過雪糕啦！真係好好味呀！

佢地D野食都OK，係三文魚刺身就少D，好似出左兩輪，D冷盤同熱盤都普普通通啦！不過D甜品就真係好好味同多花款，當然D雪糕....唔洗講啦~正呀！

我地因為入去食都係主要食佢D甜品同雪糕，所以我地都好滿意！依餐又真係幾抵呀，百幾蚊就食都好飽飽咁走！

不過走嗰時我地兩個都話一定要決定減肥先得啦，因為我地真係食左好多野，實又肥幾磅先得啦！

又玩指甲花

繼上次整左個十字石仔花之後，玩指甲癮又嚟啦！

今日行街路過SKIN FOOD，見到有D靚靚指甲油買，所以就同小豬媽入去八吓啦！我地揀左好耐，就買左幾支特別顏色指甲油啦！

一食完飯就開始塗..塗...塗，整左半個鐘，今次加埋小豬媽嘅幫手，終於又玩左啦！

今次用左金黃色指甲油，襯粉紅色花仔，又幾好睇哦！

雖然金黃色好似激左少少，不過見放假....玩吓都冇所謂啦，返工就唔得啦！

唔知點解，覺得塗指甲真係會上癮呀~~依家真係好鐘意玩指甲呀~~我已經諗緊下次用乜顏色貼乜花花啦！

玩指甲其中一個原因就係放假可以玩吓啦！另外因為知道自己塗左指甲油，就一定唔會去剪指甲，咁就可以留長D啦！

依家諗諗吓，真係可以考慮結婚唔去整水晶甲，自己塗好D，再貼少少靚靚花仔就得啦，自己都唔係真係整得太差呀~

同埋聽人講整水晶甲同除甲都會好痛，我自己又怕痛哦，所以真係可以諗諗自己塗或者出去修甲再畫甲呀！

收獲豐富的一天

今日真係收獲豐富，仲行到成個人散晒呀！

首先就係同小豬媽去左金都商場睇野，原本都好想去睇吓有乜玉桂狗花車公仔，或者其他靚靚公仔。不過都睇唔到有合心水嘅公仔呀！唔通真係冇得用公仔做花車？希望遲D再去睇可以有意外收獲啦！

另外就係去睇小豬媽嘅媽咪衫租啦！其實睇左都好幾間，不過小豬媽都揀唔到合心水，因為佢又唔想太誇張同太閃，所以成日話我唔係最難揀衫嗰個，小豬媽先係最難揀呀！

行左金都一陣，就入左一間專租媽咪衫嘅地方，試左幾件之後，終於都係小豬媽試左一件合心水嘅衫啦，所以就決定租依一套。雖然比其他係貴左少少，不過著上身又真係幾靚，同合晒小豬媽心水呀~

睇吓小豬媽幾靚，佢話要減番幾磅，到時一定好靚呀！

任務完成後，我就去左車車介紹嗰度買啤牌啦！雖然依家買好似早左少少，不過我見今日都出開嚟，不如買定啦，因為我都好少出旺角嘛！可能加左價啦，冇之前車車講咁平，不過依家個價都幾平呀！依D都係打算買嚟俾客人席前玩，都係幾個鐘時間，又唔洗真係買太貴啦！

我地先買一幅睇吓，睇左個質感同幾好，玩得過哦！最後我就買左15幅係婚禮嗰日用啦！其實都唔知要唔要咁多，不過買定都冇壞呀，到時如果唔夠仲弊！

最後一個收獲....就係一個靚靚介指盒啦！

其實我都想買依個介指盒好耐啦，不過係網上睇到個價都幾海鮮，都唔知係點個先抵，所以一路都冇打算去買！不過前幾日係CHRISTINA個BLOG見到佢買左，一問之吓仲發現好抵呀！所以就SEND左個E-MAIL俾個賣家買番一個啦~剛剛今日出開旺角，所以就約埋個賣家交收啦！

睇吓個BEAR BEAR介指盒，真係可以話又抵又靚呀！我終於都買到個靚靚介指盒！
(我真係想買好耐啦！好開心呀~~)

擺埋對結婚介指入去，真係幾好睇....到時係註冊處用，一定好靚靚呀！

轉晚裝

今日又去左睇吓有冇新衫，想轉左之前揀左嗰件紅色晚裝，因為睇睇吓...實在太紅啦！

原本都係打算轉一件，點知我竟然三件都轉晒款~

一上到去，我就去睇左D新款，有幾件我都非常鐘意，CHECK過有期之後，我就即刻去試啦！

我新揀三件晚裝，依件我就最鐘意，連小豬媽都好鐘意呀！因為係我最鐘意嘅綠色，同埋著上身又幾好睇，好似都幾襯我呀！另外，依套又可以襯到小豬媽俾我嗰SET靚靚嫁妝。

綠色都幾特別呀！我打算依套係席前同來賓影相。(因為依個時間係最多影相，我當然找一件最鐘意嘅係依個時候影啦！)

揀左件綠色之後，我記得之前我有揀過一件淺綠色嘅晚裝，我又係好鐘意，因為著得我好靚，同個個都讚嗰件好靚嘛。係我唔知點決定既時候，個SALES姐姐就話嗰件有另一件係紫色，所以我就試吓啦！可能個款幾好，我都好鐘意，所以又轉左啦，我打算用依件係敬酒時段著！

最後，我又係新款入面揀左件粉紅色，其實我之前都好想揀一件粉紅色呀，不過睇中嗰件冇期。好在新番依件都好靚，著上身都幾好，所以就揀左啦！我打算用嚟送客著呀！

原本都想睇吓其他婚紗款呀！不過試過都係上次揀嗰件幾好，著得我好瘦，所以都係唔轉婚紗款啦！

今次揀依三件晚裝我都好鐘意，我估我應該可以決定嗰晚著嘅衫啦！

不過今日係試衫發覺我真係好..好..好...肥呀~~~希望用仲有依三個幾月，可以最後衝刺好好KEEP吓先得啦！

救得番..仲好靚呀

之前咪話大肥豬有一張係幼稚園戴四方帽嘅畢業相，不過因為佢放左入一個相框度，但張相痴左住塊玻璃度，整唔到嘛！

我終於係前幾日見學校冇乜人問左我個電腦好叻嘅同事可以點整，個男同事教左我一個方法起張相，仲幫我試吓起張相呀！不過係整之前仲幫我連玻璃一齊SCAN好留底。

點知個男同事話，已經SCAN好左，可以幫我執埋呀~~我嗰時都真係唔係幾好意思呀，但為左張相都要尷尷尬尬請佢幫手啦！

原本張相係好舊呀，左面有一大攤濁，同埋有好多塵呀~~都好怕要男同事用好多時間幫我整呀！有少少唔好意思呀！

不過...佢真係好快手呀！我剛剛起身CHECK E-MAIL，就收到個FILE啦！

睇番新舊兩張相，真係好執得勁呀！完全唔睇唔出係舊FEEL，仲好新嘅感覺呀！


(大家睇吓大肥豬細個嗰樣，係唔係好攪笑呢？)

睇到張相真係好開心呀~~成日都要麻煩人，真係唔好意思啦！

依家可以放埋張相入成長MV啦~~哈哈哈！

我都打算拎張相去放大做8R，連埋我幼稚園畢業時影嗰張都係8R(不過我冇戴四方帽)，用相框整好佢，擺起我地新屋入面！

因為真係好有紀念性呀！第日如果可以同埋我地個BB幼稚園畢業相一齊擺，一定好得意呀！

終於放假喇

等左咁多日，終於輪到我放假啦，真係開心都彈起呀~~

一連串嘅假期節目，真係諗起都開心呀！但都有少少唔開心，頭先睇天氣報告，下個星期都會落雨呀！真係~~人地放假先嚟落雨，行街街都冇晒心情啦！

不過...唔緊要啦！放假係可以放鬆一吓！

如真係落大雨要留係屋企，我都可以煲...煲台劇、韓劇，因為我之前買買埋埋勁多碟都仲未睇呀~~真係要的起心肝睇左佢地先得，如果唔係真係會好OUT呀~

依家個心情真係勁高興呀！

打到嚟啦

終於都打到嚟啦~~

今日一起身就知打一號風球，仲要係之前個風打番轉頭，真係都唔知想唔想佢打嚟好。因為小豬媽話如果個風打番轉頭，一定係好勁呀！不過都唔理咁多啦，係一個大雨嘅情況吓番左工啦！

唔覺唔覺就已經係二點幾打到八號風球啦！真係好耐都冇試過係返工途中可以早放啦！

但唔知點解係我走嘅時候又唔係太大風同大雨，不過就好忟啦！因為我不停咁打俾大肥豬、小豬媽同LULU妹(因為都擔心佢地呀！)，點知打極都打唔到，個電話都唔知仲乜，真係想死呀！

好在...走緊時，收到小豬媽電話，仲陪左佢去買餸！

唔知係唔係個個都要趕住買多少少餸返屋企存貨，所以成個街市都迫滿晒人呀~~我地都因為怕人多，所以隨便買少少野，夠今晚嗰餐就算啦！

係差唔多買完餸時，就收到大肥豬電話，知佢都係回家途中，都真係放心晒！大肥豬仲要第一句同我講：終於打都俾你啦~。聽完真係好開心，原來佢都好擔心我呀！

係返到屋企樓下，又見到LULU妹哦...

真係~~個個都安全，冇俾風吹走啦！

唔知個風幾時走呢？容許我自私地諗：最好就聽日中午後先走啦，一嚟我聽日要返工，二嚟聽日一早大肥豬就要跟佢學校番大陸交流團，如果聽日落左風球佢就要出發！睇個風好似上左向北移，會好易打去廣東一帶呀(大肥豬都好似去嗰頭呀)，仲要搭船上去.....好危險....真係好驚呀！

希望個風球可以遲D走，過左明早先啦！

唔知乜事

今日都唔知做乜，成日都『吽吽哣哣』，冇晒精神，好似有好多野煩，但又唔知係為乜......仲有少少想喊嘅感覺，不過都係唔知為乜！自己都覺得真係~~~變態呀！

究竟係我自己諗多左，定係真係事事唔順呢？定真係我過份緊張呢？

加上塊面嗰排暗瘡，真係想死呀！已經冇食熱氣野，都唔知仲乜都可以生咁多粒粒，仲要粒粒都好毒，又紅又腫，仲要冇濃頭.....真係好醜樣呀！

好在成個下午同朋友仔玩MSN打發吓D時間同思想，心情好似好番少少。

雖然心情唔知係點，但都有開心野，就係大肥豬今日放假過左嚟同我食LUNCH，平時唔准我食太多生冷野，怕我身體唔好哦，所以都好少建議去食壽司，但今次主動提意同我去食壽司，真係好開心！

另外，都仲有一件開心事。就係糖糖幫我整好左新天地婚紗MV啦！(真係唔該晒佢啦！)因為我知道佢係用左好多心機同時間，仲不停俾我煩住要改野，真係唔好意思啦！(希望糖糖唔好介意仲要幫我執執啦~~)

我成日都諗，其實我都真係好幸福，有好多人錫呀！真係要學習吓唔好為少少嘢影響自己心情。

因為幸福非必然，一定要好好珍惜依家所擁有嘅野(不論開心定唔開心！)

未出發..先興奮

終於都等到啦....下星期就開始放大假，所以依幾日Holiday Mood真係超濃郁呀~~

今個放假都係留港消費，大肥豬冇得放假呀(佢要留嚟D假12月用呀~)，不過唔緊要...我依家都PLAN左有好多節目啦~~我估依個假期都係圍住攪結婚野多啦！

其中一日會去睇吓有冇新衫番，因為我想去改左件紅色晚裝，依家嗰件太紅啦！同埋想去試吓有冇A-LINE款晚裝，希望可以有好收穫啦！

有一日我會同小豬媽去金都睇吓有冇靚靚媽咪衫租，同埋睇吓有冇結婚用品睇吓啦！

有一個特別節目就係今日先PLAN呀~~~

尋日係LALA個BLOG見到佢介紹左金域假日酒店嘅Haagen-Dazs Tea Buffet，睇就好似好正，除左有一般Buffet嘅野食之外，最重要是有八款雪糕無限量供應，又唔係太貴，我有中銀信用咭又有折，埋單都好似$100左右就得啦！

所以我已經即刻打電話Book左位同小豬媽下星期去食啦！真係好開心呀~~因為我好鐘意食雪糕呀！雖然係會肥左少少，不過都係一次呀，唔緊要啦，最多依完依次Buffet再減肥啦！

依家真係.....未出發..先興奮！

學人玩指甲

前幾日行過SASA，見到佢地有隻新出嘅日本3D指甲貼紙，我就去睇吓啦！點知....唔行由至可，一行到去就大出血啦！因為D貼紙實在太靚啦，有花花，又有石仔，仲有好多唔同顏色，我都忍唔住買左幾多呀！

原本打算係生日前用小M送俾我支指甲油加埋我揀左最靚嘅貼紙整，不過尋晚諗諗吓...都係之前試吓整一次先，等唔好到時失敗左整唔靚嚟過生日嘛！

所以尋晚一食完飯就開始塗..塗...塗啦~~~經過差唔多兩個幾鐘頭嘅努力，同LULU妹嘅協助，終於都大功告成啦~~~

整得靚唔靚呀？原來依D貼紙都好實(日本野即係日本野)，一落到指甲就唔可以除番落嚟呀，所以真係要好小心。整左手時都OK，不過一到貼右手時，真係貼得好唔就手，所以要LULU妹幫手整呀！就係咁...LULU妹話好靚，仲話要係我結婚嗰日整依D貼紙呀~~真係...LULU妹開始要扮靚啦！

小肥豬係唔習慣留指甲，因為成日覺得打字唔方便，同埋指甲一長少少，就好容易斷甲，所以一向D指甲唔係太長，攪到塗左都好似唔係太靚。不過今次都係試驗，等過多兩個星期，D指甲長多少少，就可以好靚靚啦！

我的嫁妝

今日收到我嘅第一份嫁妝，係小豬媽送俾我呀！

今日放工俾小豬媽約左去食下午茶，係我地食食吓，小豬媽就話去買餸前去金鋪買埋套嫁妝啦~

一入到間金鋪，個職員姊姊已經拎左成套龍鳳鈪連條龍鳳鏈出嚟，原來小豬媽一早就已經係間金鋪訂做左一套新嘅！今日有得拎所以就帶我去拎啦！

依套首飾真係好靚呀~~小豬媽就話鐘意佢個款好新潮，唔似一般嘅金器。

依條就係龍鳳鏈，佢斤兩都幾勁，戴上頸都要有D力呀！

依對就係我嘅龍鳳鈪，係同條鏈一SET，好靚呀~~

另外，我成日都想自己買對耳環襯掛時帶，所以就睇埋啦！

我就揀左依一對，因為貪佢有少少白金，可以襯埋晚裝嘛！原本依對都係打算自己買，點知小豬媽話買埋俾我，唔洗我自己俾，因為當係嫁妝嘅一部分！

因為當我知道埋單條數時，真係幾好..好...好....『甘』呀！見到小豬媽俾錢時，我都好肉痛呀！

不過小豬媽話最緊要係靚同出門大體，所以都值得呀~~

聽完之後，真係...既開心又感動呀！仲有少少有想喊嘅感覺呀！

唔知到結婚嗰日，小豬媽幫我戴上身嘅時候我會點呢？我估我一定會做左個大喊包呀！

初步選好童年照

吹左大肥豬好耐，終於尋日都拎左佢D小朋友相俾我揀相做成長MV。

點知.....佢真係少相到有少少嚇人，加埋都唔知有冇十張，仲要係好多都係合照，單人照就真係揀冇好揀，都真係幾頭痛。

到最後都揀到幾張放入MV入面，不過比例上我係多少少啦~(冇法啦~~鬼叫小肥豬細個時咁可愛！)唯有係大家放少D細個相，放多D拍拖相啦~

大肥豬仲將我地揀左嘅相SCAN入電腦度睇，真係俾佢激死！不過...既然已經SCAN左入電腦，咁我當然冒身命危險放一張上嚟俾大家睇啦~(因為大肥豬唔准我放上嚟，話俾人睇晒到時冇驚喜哦！不過我放一張唔覺呀~~)

我仲俾大肥豬激死呀~~佢叫我放大細個張相，貼係依家塊面度，咁會仲可愛哦~~(真係....激死我啦！)

左面就係大肥豬幼稚園開生日會時影呀！右面就係小肥豬剛剛訓醒準備番學時俾媽媽偷影，完全係訓唔醒樣呀！哈哈~~係唔係好可愛呢？

有一個難題，希望各位朋友仔可以幫吓手呀~~

就係大肥豬有一張係幼稚園戴四方帽嘅畢業相，不過因為佢放左入一個相框度，可能都擺左好耐，張相痴左住塊玻璃度，依家除唔到出嚟SCAN呀~唔知大家有冇辨法可以解決到依個問題呢？教吓我啦~~因為真係好想放埋依張係成長MV入面呀！

一歲啦

原來我個BLOG已經一歲啦~~時間真係過得好快呀！當初都係見好多朋友仔都講吓自己婚禮籌備嘅情況，所以都貪得意咁開左一個屬於自己嘅BLOG。

開頭都以為自己係得三分鐘熱度，不過寫寫吓，真係好似愛上左寫BLOG。所以睇其他朋友仔嘅BLOG同寫自己個BLOG都已經成為左自己嘅習慣啦！

寫BLOG可以同其他朋友仔分享吓自己日常事同結婚事，有開心同唔開心。當有唔開心嘅時候，除左可以發洩左出嚟之外，仲得到好多BLOG友仔嘅慰問，真係有一種好心甜嘅感覺呀！

另外，我都覺得寫BLOG原來可以有一種推動力，作為一個準師奶仔，成日見到好多靚太出色嘅煮藝，見佢地咁叻，都總係會偷師，希望有朝一日可以好似佢地咁叻，可以煮都一手好廚藝。(希望佢地唔好介意我偷師啦！)

講真...係個BLOG度我真係識到好多好好嘅朋友：小賢、小M、車車、七七、黃夫人、白文e蚊、珍珍......仲有好多未能盡錄。有一班BLOG友仔對我嘅注意，佢地一個留言對我都係有一個好好支持呀！發覺真係好奇妙，可以係網絡上都能識到一班好好嘅朋友，其實我都幾幸福呀！

除此之外，我仲係個BLOG度可以找番同我失去聯絡嘅一個中學好好嘅同學，所以真係原來BLOG嘅力量真係好大呀！

下一個一年雖然到時我已經做左人老婆，要照顧成個家，唔知仲有冇太多時候寫BLOG，我自己一定會盡量做，希望可以KEEP到啦！

不過...各位BLOG友仔要繼續支持我呀！

雙方家長見面

今日終於都到左雙方家長見面嘅日子啦！

講真...當初都真係好擔心，因為唔知四大長老會講D乜，成個飯局唔知會唔會好有『火』花呢？雖然佢地大家平日都冇乜野，對我地都唔會有太大要求，但始終都係一個尷尬場面，所以都真係幾驚恐呀！

好在...今日總算順利過程，基本上都冇乜點解我地結婚嘅野，我地最怕講嘅三大敏感話題都冇講到，大家都只係大家傾吓日常嘅小話題。

可能大肥豬阿哥同家姐都帶埋佢地嘅小朋友一齊去飲荼，所以好多焦點都去左佢地度，講吓D小朋友咁時間又真係好快過左啦！

雖然成個茶局都好似氣氛都平平淡淡，但平淡唔係仲好嗎？終於都放左心頭大石啦！