K1大作戰

12 OCTOBER 2012(FRI)

小小豬返左N都未夠兩個月，我地又要開始為K1作戰啦！

講真....我覺得小小豬依家讀緊嗰間都真係幾好，感覺幾位班主任老師都好有愛心又錫小小豬，從小小豬嘅表現都覺得佢好鐘意返學。

既然咁好，點解又要嚟大作戰呢？其實最主要原因係因為小小豬依家讀緊嗰間幼稚園聯繫嘅小學將會停辦四年進行校舍維修，到小小豬升小一時，都應該仲未可以直升，所以大肥豬就打算趁依個升K1時段，搵定啲可以有小學嘅幼稚園，買一個安心。

其次就係，當然仲希望小小豬可以入到啲更好嘅學校(當然我仍然都係最想入到我PN時最心儀嗰間啦)，課程可以全面啲，等到時升小一唔會咁辛苦。(因為大肥豬始終覺得依家嗰間課程比較淺)

就係咁...又嚟開始填填填，填報名表啦~

今次依個選校工程我全權交晒俾大肥豬負責，大大話話都幫小小豬報左十幾間，即係又嚟好多間要去面試啦！

唉...又嚟緊張嘅過程開始啦，仲有機會一日走幾場(因為有幾間都註明左面試日期)，唔好話小朋友，就算大人都覺得趕啦，可唔可以唔好夾埋一齊IN呀！其實我有時會諗....都係用幾分鐘嚟IN，係依幾分鐘係唔係就可以咁快睇到小朋友係唔係合佢地心水呢？

不過，今次反而我又冇PN面試時咁緊張，本著平常心啦，當帶小小豬去玩一場。取錄與否都唔到我地控制，只希望小小豬係面試時唔好扭計，可以依面試老師嘅指令做好面試就好啦！


**我的微博..關注啦**