開始作戰

27 OCTOBER 2012(SAT)

話說半個月前先開始為小小豬K1填入學申請表努力，咁快到左今日就開始要去面試，今日我地去左深水埗區某龍校IN呀！

回想起上年第一次去IN，我都真係非常緊張，仲記得入課室時成個人都震晒咁。不過今日帶小小豬去面試時，心情真係輕鬆左好多，本著帶小小豬去玩嘅心情，真係完全冇壓力呀！

面試嘅小朋友實在太多，雖然我地都有登記到，不過都要係門口等左二十分鐘左右先可以入到校門，真係覺得有少少誇張。入到學校，仲要等老師叫NO先可以入課室。不過好在可以係個小操場上玩吓，睇吓有得玩嘅小小豬幾開心~

大約再等多二十分鐘，終於都到我地入課室面試啦！今次面試可以兩位家長陪，以小朋友玩玩具，老師從旁問問題及觀察小朋友反應。

講真....小小豬嘅表現都唔係太好，係玩玩具方面都叫做OK，玩兩種玩具都可以玩到。不過佢啲 怕羞就成為佢嘅弱點，有時老師問佢問題時，都好似怕怕羞羞咁好細聲咁答，我地就話對得佢耐知道佢講乜，不過老師就好似聽唔到小小豬講乜(依度實行扣晒分啦)。

面試大約三分鐘左右就完，如果你問我，我都覺得可以取錄小小豬機會都唔係太大，始終面試時未能發揮佢最好嘅一面，反而俾老師見到佢怕羞一面。加上我地周圍嘅小朋友都好似比小小豬大個啲同醒啲，學位又唔多，所以都真係可以打定輸數啦！

今次都係第一次面試，仲有好幾個嚟緊，我地要吸收今次嘅經驗，希望可以同小小豬補救一吓，下次再去其他學校面試時一定會有好表現呀！

不過...話事話，等入課室面試時，加加埋埋都等左半個鐘有多，而面試時間又只係得三分鐘。小朋友等咁耐先去IN，真係等到等到悶，又點會有耐性係同老師見面時有好表現呀！有冇啲媽咪朋友仔可以教吓我，點可以係依幾分鐘將小小豬嘅能量爆發出嚟呢？

當然都係嗰句：平常心....當去玩，唔好有咁大壓力俾自己同小小豬呀！







**我的微博..關注吧**