有樣學樣

28 SEPTEMBER 2012(FRI)

星期五又係我為小小豬埋頭苦幹嘅日子，因為學校會派返手冊同通告，又要著手幫佢填填填啦！

就係今日我開張枱仔為小小豬填緊仔仔嘅通告時，個傻仔見我開枱寫字，自己就去搬佢張私家枱係我旁邊，又拎啲紙筆出嚟，學我一齊寫字呀~

佢真係好認真咁寫字呀，當然....啲字就只有佢自己明白係寫乜啦！

依家都真係覺得小小豬啲模仿能力好強，好多時我地做乜，佢都會自動自覺咁好快可以做跟住我地做，有時佢嘅模仿力都真令我有啲驚，好驚我唔覺唔覺做左啲唔好嘅嘢，俾佢學到(雖然我都冇乜唔好嘢，同埋都已經好小心...不過都好驚有一啲少事俾佢學到呀)。

好多人都話小朋友就係一面鏡，我地大人做乜佢地就會做乜，我依家都深深咁相信依一句話。加上小小豬依家係兩歲正處於反叛期，我地要再努力做個好榜樣，希望可以慢慢咁令小小豬可以成為一個好寶寶啦！

認真過後，小小豬又嚟開始激動，佢激動嘅唔係啲百厭事，係佢好情緒高漲咁唱歌呀~

我聽左好多次，終於知道小小豬係唱緊『快樂笑笑』依首兒歌，相信都係學校依排教佢唱依首歌，所以佢就成日都唱啦！

BTW....由於學校買嗰隻CD係冇『快樂笑笑』依首歌，我見小小豬唱得咁開心，好想多啲俾佢聽，等佢可以熟練啲呀！不過我上網睇過又搵唔到依首歌，又未有時間可以出去搵，所以我想問，唔知有冇其他媽咪朋友有依隻歌呢？如果有唔知可唔可以借俾我，或者俾依首歌嘅MP3我呢？我都知咁唔係幾啱，不過為左小小豬，相信大家都唔會介意嘅....麻煩晒呀！


**我的微博...快啲嚟關注我地啦**