開心迪迪尼之旅 - PART 1

尋日同大肥豬老公去左迪士尼玩左成日，真係只可以用三個字形容  - 勁好玩！

其實今次都已經係第三次去迪迪尼，不過前兩次都係開幕之後一個月去過，同埋都有好多人一齊入去玩。今次個心態就有少少唔同，因為係得我同大肥豬兩個拍拖去，仲要係新婚後去，所以好似浪漫少少啦！

今次係因為迪迪尼換左個新佈置叫 - 迪士尼雪亮聖誕，所以一入到去就好感受到聖誕氣氛。尤其係一行入美國小鎮大街，見到好多卡通人物著晒聖誕版嘅裝扮，心情真係完全好輕鬆，好似入左童話國咁呀！

一向鐘意影相嘅小肥豬當然唔放過同聖誕版公仔影相啦！不過排隊又真係好長龍，尤其係米奇同米妮，真係排左成45分鐘有多，不過D公仔咁靚，都值得呀！

因為時間關係，當我第二個時段找唐老鴨影時，DAISY已經去左休息啦！所以就只可以同唐老鴨影相，不過，唐老鴨都好靚，好多古怪POST呀！

原本打算繼續影落去，去同聖誕高飛影相，不過去到已經CUT左人龍，冇得影啦！真係有少少美中不足，不過我一定會再入去影埋佢地呀！

影完相之後，我地就四周行吓先啦！點知俾我見到史迪仔同牛仔牛女，所以我就一支箭咁飛去排隊影相，排完史迪仔又飛去排牛仔牛女，因為依兩個新公仔係我前兩次入嚟都冇，所以一定要影影影呀！

影左一陣相之後，肚仔餓啦~~所以我地就去左灰姑娘餐廳食野啦！記得上兩次都係得好少款揀，仲要麻麻地。今次真係多左好多款野食，仲好豐富呀！所以我地都食到飽飽咁再去玩呀！

係等睇巡遊前，見有時間就去左行精品店，真係好靚呀~~好多野都想買，尤其係D盒仔，真係好鐘意呀！我都忍唔住拎起影相呀！

不過大肥豬話買依D盒仔唔太實用，所以冇得買呀！不過我地都買左兩件童裝衫仔俾兩位小朋友，又買左幾個鎖匙扣送俾LULU妹同嘉汶表妹。

我都有份小禮物呀，就係大肥豬老公送俾我嘅MARIE頭飾。買左之後，我仲即刻戴上頭扮可愛呀！哈哈哈~~原本都覺得有少少貴，不過大肥豬知道我勁鐘意MARIE，又叫我次次去迪迪尼都帶埋去戴，咁就抵番晒啦！

買晒戰利品之後，就開始睇巡遊啦！可能我地冇一早霸位，所以都唔係太前，但都好感受到開心氣氛，聽到D音樂成個人都好興奮。

當巡遊完畢，兩旁開始嘖白色泡泡，成個落雪嘅氣氛，感覺真係好正呀！

之後我地就向遊戲出發，等係PART 2 同大家講啦！