係回門當日都有睇過D禮物，不過就冇時間慢慢睇同影相，所以要留番今日去小豬媽屋企食飯，先有時間慢慢睇。
好啦~~等我慢慢講吓D禮物先。
依份係BLOG友仔 ~ 車車送俾我呀！因為佢知道我依排愛上左迪迪尼，所以就去迪迪尼時買左依份靚靚擺設俾我。真係好靚，好鐘意呀！我會留番新屋佈置用呀！
第二份就係BLOG友 ~ 叻叻送俾我呀！係一SET好香嘅洗白白用品呀！哈哈~用左真係好香，好鐘意呀！
依份禮物收時真係好驚喜呀！因為係我一位係BLOG上相認番嘅中學舊同學送呀！依位朋友仔真係好有心，係冇通知我情況吓，突然上左我婚宴酒樓送依份禮物俾我，真係好開心同好驚喜呀！
依份小禮物就最奇怪，因為開頭完全唔知係邊個送，佢仲好有心知道我個最愛係玉桂狗，所以一直都以為係識得我嘅朋友仔送。點知問問吓又冇人回應哦！最後終於都找出個送禮者啦，原來係其中一位兄弟嘅女朋友送，因為依位兄弟曾經問過大肥豬我鐘意乜公仔，所以就專登叫佢女朋友送俾我地，真係細心啦！
依本日式結婚相簿就係我細姨送，佢仲好攪笑咁叫我用依本相簿放晒同佢地影嘅相呀！
依一份就係我最驚喜....最開心....禮物，就係由小豬媽送嘅迪迪尼全年通行證，仲要係任何時間都可以去呀！
當我地敬完茶送完金器之後，小豬媽就拎左依兩張全年通行證出嚟送俾我地，嗰吓係完全唔知講乜，只係知道好開心同驚喜...總之就係感動，內心只係感到小豬媽真係好鍚我....真係好唔捨得佢，又要忍住喊...所以真係唔識講啦！
其實仲有一份禮物，就係嘉汶表妹送左一隻鑽石介指俾我，依份禮物當我預備上頭前佢送俾我。一打開個盒仔，真係好感動，因為佢都係剛剛出嚟社會做野，就要佢買份咁貴嘅野俾我，真係好開心....不過因為個SIZE太大，要拎去改，遲D先可以俾大家睇啦！
沒有留言:
發佈留言