蒜蓉粉絲蒸鮮魷

4 MAY 2013(SAT)

早幾日睇左肥媽教煮餸個節目，係後半部分有個肥仔廚師教煮整鮮魷兩食。我都係好鐘意食魷魚，所以佢教嘅時候就特別留意。本身我對佢個炸魷魚鬚興趣大啲，不過就好似好難整咁。但見佢兩三下手腳就整完個蒜蓉粉絲蒸鮮魷，好似好易咁，都打算搵日煮番餐。

今日行街市買餸時，見到啲好新鮮嘅魷魚，所以今日就嚟煮新餸啦！

原來材料都真係好簡單(仲有牛油唔記得左拎出嚟影相)~

先將鮮魷洗淨，洗到佢白雪雪之後，就切片界花備用~

粉絲浸軟備用~

用牛油起鑊，然後將蒜蓉炒香成為蒜蓉汁，因為我想個味出啲，所以用左三分二個蒜頭嚟啄成蒜蓉~

將粉絲放入蒜蓉汁內，等啲粉絲入味先~

原本都只係將啲粉絲放上鮮魷面蒸，不過因為大肥豬勁鐘意食粉絲，我就浸多左少少。我就先將粉絲墊底，然後鋪上鮮魷，最後再放多一層粉絲及少少生蒜蓉~

蒸十分鐘就完成啦~

第一次煮真係好有成功感，啲鮮魷真係好鮮甜，啲粉絲又入晒味，就連平日都唔多會主動讚我嘅大肥豬都話好食，叫我一定要ENCORE，真係超級開心呢！

**我的微博..關注吧**