預祝母親節晚餐

7 MAY 2013(TUE)

星期日先係母親節，不過因為當日有事要做，所以就揀左今日提早同小豬媽食預祝母親節晚餐啦！

其實原本我地都PLAN左去灣仔食齋，不過大家啲時間又好難就，第二日小小豬又要返學，小豬媽又怕太夜驚小小豬唔夠精神第二日返學，所以諗佢好耐，都係話叫我地夾錢俾佢買餸，等我地係屋企舒舒服服咁食餐好嘅。

當然，我係唔會俾小豬媽咁辛苦，所以我都有份煮。同小豬媽由下午開始一齊忙，一齊煮左個好豐富嘅母親節晚餐~

哈哈哈...以下啲餸係我負責呀！

一口小鮑魚~

蒜蓉粉絲蒸鮮魷~

電飯煲焗雞~

仲有我第一次煮嘅生菜包~

因為小豬媽啲豬肉係要自己啄先夠有口感，所以真係啄都我手都軟埋。不過辛苦都係值得，因為依個餸係最受歡迎呀....哈哈哈！

小豬媽主理嘅

勁好味嘅咖哩蝦，依個我都曾經煮過，不過總係冇小豬媽整得咁好食。今日係好日子，所以就交俾佢負責啦~

蒸大星斑~

炒菜芯~

合掌瓜粟米煲豬腱湯~

哈哈哈...咁好餸，睇吓小小豬食得幾招積~

一家人開開心心食飯，就係最開心嘅事呀~

話係慶祝母親節，不過就要兩位母親煮俾大家食。學小豬媽話齋，母親節都係一個藉口等一家人開開心心咁聚埋一齊食餐飯，只要見到大家食得開心，咁就唔會覺得辛苦，仲會好有滿足感添！

咁又係哦...見到大家讚賞我煮嘅嘢食時，我都真係好有滿足感，亦都好有動力去繼續學煮多啲嘢呀！

**我的微博..關注吧**