1 MAY 2013(WED)
今日雖然係放假,不過天氣唔好,所以真係冇乜邊度好去。尋日整完棉花糖之後,整嘢食條引又出左嚟,所以下午就留係屋企整餅啦!
由於都係突如其來,加上又好想食斑蘭蛋糕,所以就近近地落樓下間蛋糕材料店買嚟整椰汁斑蘭蛋糕啦~
先打蛋白(3隻雞蛋份量),將1 湯匙白糖分3次加蛋白中打,打至像軟雪糕般有倒勾狀,然後放返雪櫃雪一陣備用~
將蛋黃打至蓬鬆~
加入半盒斑蘭粉及1/2茶匙吉士粉於蛋黃漿,直至蓬鬆變白~
再加1/4茶匙斑蘭精~
加椰漿攪匀~
最後係雪櫃拎返已打好嘅蛋白,用膠刮慢慢混合~
慢慢倒入小蛋糕杯內~
預熱爐180度8分鐘,用低架,160度光波25分鐘~
焗好後,用牙籤篤吓睇吓入面熟未,如果牙籤冇痴麵粉,就即係可以出爐啦~
雖然個面頭燶燶地,但整體上都算成功,都好鬆軟呀!不過我就覺得個斑蘭味唔係太濃,如果濃啲就仲好味呀~
下次再整時要加高圈,等個發熱位唔好太接近個蛋糕面,咁到時應該會靚仔啲呀!
睇吓個為食小小豬,一瞓醒出嚟就係度扮可愛,目的就係想食蛋糕呀~
不過因為濕疹關係,小小豬唔可以食蛋白,所以佢都只係可以有得睇冇得食得,等我下次整啲冇蛋白嘅先俾佢食啦!
經過今次成功之後,我條整蛋糕嘅引已經浮哂出嚟,相信嚟緊都好大機會會成日整啦....哈哈哈!
話時話...個善後工作真係幾麻煩,整一整個蛋糕就有好多嘢洗,但係整嘅過程又係好開心,依啲係唔係就係叫做先甜後苦呢?不過,見到個成功嘅製成品,食嘅人仕又話好食,所以麻煩少少都唔緊要,最重要係有人識欣賞嘛!
**我的微博..關注吧**
沒有留言:
發佈留言