話說之前我地去錦田鄉村俱樂部玩撈金魚有八條戰利品，當時小豬媽話想拎返屋企等小小豬多啲睇吓魚仔，等佢可以培養一吓照顧小動物。所以小豬媽就即場買左個小魚缸，帶啲魚仔返屋企。
雖然個魚缸都有啲氧氣珠提供，不過臨走時，我見啲魚仔開始唔係好對路，幾經考慮，大家都覺得啲魚仔俾返個職員會好啲，起碼唔會咁快C嘛！
既然買左個小魚缸，所以小豬爸就話過兩日去買隻烏龜仔，一樣都可以等小小豬培養照顧小動物，又易養啲呢！
過左幾日，小豬爸就買左隻烏龜仔俾小小豬。小小豬見到都不知幾肉緊，成晚都魚缸不離手呀~
不過，大肥豬話怕烏龜仔初初去到新環境唔適應，所以唔俾小小豬照顧住，就交由LULU妹照顧住先。
到左今日，烏龜仔都嚟左屋企成個星期，係時候可以等小小豬同烏龜仔嚟個親密接觸，先嚟等小小豬幫烏龜仔洗白白先啦！
我教左小小豬一次幫烏龜仔刷個殼，個傻仔仔真係好認真，一路唱住刷刷刷歌仔，一路同龜仔洗白白，完全好投入，唔係玩玩吓呀~
哈哈哈....睇吓個傻豬仔刷得幾興奮~
依家先教佢同烏龜仔洗白白，慢慢先再教佢餵食物啦。始終小小豬都仲係細，所以都係一步步咁等佢學習照顧烏龜仔啦！
同場加映：大家有冇留意到小小豬隻豬眼呢？唉....咪就係因為尋晚開窗瞓覺，所以就俾隻蚊咬左一啖，咬到咁腫，相信隻蚊都已經飽到唔識飛啦，真係激C我啦！
**我的微博..關注吧**
沒有留言:
發佈留言