勁開心嘅好消息

11 MARCH 2013(MON)

話說之前我地都有幫小小豬報K1，報嘅都係龍校。因為大肥豬覺得龍校嘅配套好似係好少少，加上小小豬升小一時大抽獎又唔知會派啲乜學校，所以如果幼稚園入到龍校，咁可以唔洗咁頭痛嘛。

報就報左十幾間，不過其實我地都係去左六間左右，唔係面試日期撞晒，就係小小豬唔舒服，所以好多間都冇去(真係浪費晒啲報名費)。

小小豬就係有一個毛病，就係怕怕羞羞，加上仲未好叻咁可以講好多嘢，所以係短短幾分鐘面試時，都唔可以話有好發揮，到佢WARM-UP好就完左個面試，所以我地收嘅信大多係REJECT，不過都有兩間係WAITING，咁都未話失望都頂點。

既然過左一排都未收到CALL WAITING電話，我都打定輸數，小小豬都係轉唔到校。

點知今朝早就收到一個開心電話，叫我下午去交留位費。聽到嗰一刻真係開心都唔識形容，因為依間學校原來係上星期五先收正選學生留位費，完全冇諗過佢會咁快就CALL WAITING，仲咁快打電話俾我地呀！

今日中午我就好乖乖咁即刻去交留位費，就係咁....小小豬KI有新學校讀啦~

睇見張留位費收據，真係成個人都定晒，終於有間好學校收小小豬啦！雖然都只係下午班，不過依間龍校都係區內好有名氣，出名老師嚴格(真係啱晒..因為依個百厭小小豬都唔怕老師，等有啲嚴老師教都係一件好事)。所以 可以入到都已經真係好好運啦！(當然都要讚吓小小豬係面試當日表現比平時的好啦)

雖然係開心，不過依間學校係以國語上堂，我都有少少擔心小小豬會唔習慣，希望佢到時可以快啲適應啦！

依家我都已經寫左信去希望可以轉上午班，如果真係排到轉上午，咁就真係完美啦！(我都知自己係貪心左少少...不過為左小小豬唔緊要啦...哈哈哈！

**如果大家憑一啲蛛絲馬跡睇得出係邊間嘅時候，都請大家幫幫手唔好講出嚟，好讓仔仔有一個愉快同安全嘅校園生活呀！**





**我的微博..關注吧**