淺水灣沙灘親子旅行

9 APRIL 2014(WED)

今日小小豬學校有活動，就係舉行左親子小旅行，一齊去淺水灣沙灘玩呀~

其實都唔算係旅行，因為車程來來回回都只係有一個鐘多少少係沙灘玩，都有少少唔夠喉。不過係返學時間去玩，又可以同同其他小朋友一齊出發、一齊搭車，都係另一個體驗呀！

原本我都以為成班同學仔會有啲集體活動時間，不過就因為時間唔多，所以老師就叫我地自己玩。

一去到沙灘，撞到隔離班嘅朋友仔，所以就坐埋一齊玩啦！

不過，真係俾依個為食豬激C，每個小朋友一落到沙灘就即刻玩，依個小小豬就一返常態，要食茶點先~

食飽飽就開始玩沙~

不過玩左一陣，小小豬已經不甘於只係玩沙，要出去玩水呀！原本我都唔想出去，始終等我一個怕照顧唔到，同埋又冇帶短褲。不過小小豬好誠懇咁問左我兩次，所以最後都係陪佢出去玩陣啦！

之後就開心咁拎埋啲小工具行去海邊啦~

一去到個海邊幾興奮~

個大膽豬玩水玩到呢....仲越行越出添~

因為時間關係，所以我地都係玩左一陣，不過依一陣都可以令到小小豬內外褲仔都濕晒呀~

換好褲個時間都差唔多，我地等校車嚟接我地啦~

上到車又嚟食過~

不過食左一塊之後，個傻仔已經冇晒能量，瞓左覺覺豬啦~

間唔中參加下學校活動都幾好，不過今次就覺得時間短左啲同埋冇乜機會可以同其他同學仔多互動時間，咁就應該更加好玩呀！

今學年應該都唔會再有同類活動，期待K2再嚟玩過啦！(不過到時大個左...唔知仲有冇親子旅行呢)