蓮藕炆腩排

8 APRIL 2014(TUE)

今日又係小豬媽指導之下煮左個新餸，依個咪就係蓮藕炆腩排，個賣相都幾吸引哦~

材料： 蓮藕兩枝(因為我鐘意食，所以煮多啲)、腩排一塊、冰糖兩小粒、南乳一磚~

蓮藕要先去皮，然後清洗切件~

腩肉汆水斬件備用~

燒熱鑊，落油炒香數片薑片，下腩肉炒一陣~

之後加入南乳及少許紹興酒、老抽炒勻~

加入蓮藕繼續炒..炒...炒~

之後再入冰糖炒一會直至冰糖開始融化~

然後加入開水2碗半，蓋上鑊蓋，炆大約1.5小時(途中要因應需要加水，唔好炆乾水呀)~

最後等啲蓮藕淋同埋個南乳汁收乾後，咁就完成啦~

一碟好味嘅蓮藕炆腩排就食得啦~

開頭我都以為係好複雜好難整，不過整落都唔幾簡單，只係炆嘅過程要小心睇火，唔好炆乾水就得啦！

各位同我一樣好鐘意食炆蓮藕嘅朋友仔，都可以試吓煮依個餸，因為啲蓮藕炆到入晒味，真係好好食呀！