士多啤梨益力多布丁

7 APRIL 2014(MON)

小小豬今日又有口福，因為我又整左個新甜品，睇佢食得幾招積~

其實依一款甜品嘅名堂就係 - 士多啤梨益力多布丁，係我前幾日係BABY KINDOM有媽媽分享，見都好似幾簡單，所以學整埋一份啦！

趁今晚嘉汶表妹返嚟食晚飯，所以就整左啲嚟做今晚甜品啦！

材料好簡單，就係需要依啲啦：益力多3支、淡忌廉200ML、糖1茶匙、魚膠粉4茶匙、士多啤梨4粒~

首先將益力多及淡忌廉倒入煲內~

攪拌後加入糖，用細火慢慢煲至糖完全溶晒(糖嘅分量可以因應個人口味加減，不過我覺得本身益力多都係甜，所以我糖嘅分量都只係落左半茶匙)~

最後加入魚膠粉，要攪到溶晒冇粒粒呀~

係煲溶啲糖同魚膠粉嘅過程，記得要不斷攪伴，以防止痴底呀~

等完全溶晒之後，放涼一陣(等啲布丁凍少少先好入杯呀)~

可以入杯啦~

倒完之後就可以放入雪櫃~

雪左三個鐘之後，就可以初見到個製成品~

之後每杯放上一粒士多啤梨，咁樣一杯好味嘅士多啤梨益力多布丁就完成啦~

哈哈哈...個賣相都真係唔錯呢~

味道又如何？我地一致都覺得個味道係唔錯仲覺得好特別。不過唔知係唔係魚膠粉落多左啲啲，所以感覺就硬身左少少，口感就唔多似街外嘅布丁咁彈彈吓，但我地就覺得比較似雪糕呀~

睇小小豬食得咁興奮就知其實真係好好食啦~

今日依個新甜品唔可以話係失敗，只可以話唔夠完美，不過我已經覺得好滿足，因為整左出嚟嘅甜品有人欣賞嘛，所以我要繼續整多啲先得呀！