久違了的麻布茶房

14 APRIL 2014(MON)

話哂都係復活節假期，當然要揾啲節目同小小豬做吓先得啦！

我地今日個重點節目就係....食雪糕呀~

事緣今日我同小小豬係屋企玩緊小遊戲時候，依個傻豬仔突然話想去接大肥豬放工。既然佢主動提出，加上又困左係屋企成日，所以就出發啦！

小小豬嗰個接DADDY放工任務完成之後，為左獎勵小小豬，所以大肥豬山就帶我地去食餐好，就係去好耐都冇嚟過嘅麻布茶房啦~

還記得N年前係銅鑼灣同埋太古城都有分店，我嗰時都成日去幫襯，因為啲甜品又真係實在太吸引啦！不過隨著好多間都已經結束營業，所以都真係好少嚟食，甚至好少人提及麻布，估唔到原來樂富都仲有一間呀！

先嚟食正餐先，大肥豬叫嘅拉麵~

我豐富嘅豚肉定食~

基本上兩個正餐個味都唔錯，尤其係我嗰個豚肉定食，啲照燒汁好似包住啲肉咁，好有汁感呀！下次可以考慮係屋企自己試吓煮，希望都可以係一樣咁好味啦！

嚟得麻布，又點少得甜品呢！為左要照顧我地兩隻大小為食豬，所以大肥豬專登ORDER左兩份，等我地慢慢嘆呀~

其實依啲都係軟雪糕嚟，不過佢地配搭左啲綠茶同紅豆，個味即刻特別晒，好似好味好多呀(當然我都估佢啲軟雪糕係有特別配方)，見小小豬食得咁滋味就知啦~

我地今日又食正餐又食甜品，個味道唔錯之餘，個價錢都唔算貴，都係兩佰多蚊左右。所以大肥豬話下次我地帶去接佢放工時，再帶我地嚟食過，到時一定要試吓其他款式嘅甜品呀！