光波土匪雞翼

15 APRIL 2014(TUE)

尋晚睇肥媽嘅食平DD個雞翼十食實在太吸引，就連同我一齊睇嘅大肥豬都叫我整俾佢食。

估唔到話咁快我就整左，因為今日就應小豬爸提意整左光波土匪雞翼呀~

材料只係依三樣，雞中翼、孜然粉及黑芝麻，肥媽係有加埋孜然粒，不過我買唔到呀~

唔好話孜然粒我買唔到，就連孜然粉我都行左好幾間雜貨店我先買到呀~

首先將雞翼洗乾淨，之後加入孜然粉~

同埋少少鹽醃好~

由於我買唔到孜然粒，所以我就加左少少黑胡椒~

之後醃大約半個鐘~

依個時候就可以將啲黑芝麻係白鑊炒香，依個步驟肥媽冇教，不過我之前睇過啲食譜話炒香左啲芝麻個味會出啲，所以我就炒炒佢啦~

雞翼醃半個鐘之後，最後加上黑芝麻再醃多十五分鐘~

最後放入光波爐，以220度先光8分鐘~

之後反轉再光多5分鐘~

一碟靚靚嘅土匪雞翼就食得啦~

坦白講，坊間嘅土匪雞翼我就真係冇食過，因為覺得要六蚊一隻雞翼真係好唔抵，所以我就唔識比較。不過我都覺得個味係唔錯，但就可能落多左啲啲芝麻，所以口感就覺得怪怪咁(其實可能係我唔鐘意食芝麻所以影響個口感...哈哈)

不過有係出面試過嘅嘉汶表妹話個味同出面食嗰啲都係一樣，都話係一樣咁好食呀！

YEAH...即係話我又成功煮左一樣新餸，當見到大家食得咁開心，真係勁有滿足感呀！

哈哈...肥媽今日教嗰十款我對幾款都好有興奮，等我搵日再整埋其他款先得！