醉鮑魚&醉雞翼

24 APRIL 2014(THU)

今晚依一餐可以話係醉宴，因為整左醉鮑魚同醉雞翼，等大家一齊食醉佢呀~

首先買齊材枓先，包括花彫洒、糟鹵、魚露及果皮~

當然唔少得主角鮑魚~

同埋雞翼啦~

先將鮑魚去內臟再用牙刷清洗乾淨~

果皮浸軟切絲備用~

將果皮絲放在鮑魚面上用大火約蒸８分鐘~

另一邊將雞翼洗乾淨之後，用鹽醃15分鐘，之後用大火約蒸10-15分鐘(視在乎雞翼大小)~

鮑魚蒸好後去殼放入冰水待泠卻後~

連同雞翼一齊先放入凍水洗一洗，去咁啲油先~

之後換啲冰水，浸大約15分鐘，過吓冷河等啲雞翼同鮑魚彈牙啲呀~

用個密實盒放入糟鹵150ml~

加花彫洒120ml~

再加魚露兩湯匙然後放入杞子~

將鮑魚及雞翼放入調好的酒中，然後放入然後後入雪柜浸佢最少５小時，如果喜歡濃味可浸隔夜呀~

就係咁...醉鮑魚&醉雞翼就完成啦，係唔係好吸引呢~

唔止個賣相，個味道都真係唔錯，好香嘅酒味，但放心係唔會食醉呀！

其實成個工序都唔係太難，只係洗鮑魚過程都真係相當艱苦，要用好多時間去擦乾淨，所以睇嚟下次再整都要揀個良晨吉日啦...哈哈哈！

試用：Bio-Oil®醫學去紋除疤油

24 APRIL 2014(THU)

首先要多謝WSHARE同Bio-Oil®，等我有機會試用到好多朋友都讚嘅萬用油~

坦白講，如果唔係之前曾經有朋友仔介紹過，我都對Bio-Oil®有小小陌生，但原來佢嘅來頭都係好利害，係11國名列除疤抗紋產品銷量冠軍，所以話真係來頭真係唔野小呀~

Bio-Oil®真係一支萬用油嚟，真係身體任何位置都用得，只要配合按摩，效果會更加好呀~

不過我地真係有少少相逄恨晚，因為依支萬能油其中一個最大嘅功效就係去除妊娠紋問題，只要係懷孕第13週開始使用，有助減低大肚期間妊娠紋形成嘅可能性呀！

雖然我依方面我就用唔著，不過Bio-Oil®含獨特PurCellin OilTM配方，只需2週一次過解決新舊疤痕，對唔均勻既膚色、老化、缺水既皮膚都有好大幫助，即係我都非常合用啦！

係未正式試用之前，一聽到個「油」字都有少少驚，因為怕會太油膩令皮膚會好油膩，同埋真係好唔鐘意油笠笠嘅感覺。當了解之後才明白，其實油是一種有利於皮膚護理的介體， 只要產品能被皮膚迅速吸收，而不是只停留在皮膚表面阻塞毛孔， 自然不會帶來「油笠笠」的感覺和一堆皮膚問題。

Bio-Oil®是帶點橙色的油，有淡淡洋甘菊花嘅香味道，雖然係油性，但感覺似水一般，輕輕倒出來就會溜走的，而且按摩幾吓就好快吸收哂，而且都唔覺得好油笠笠呀~

沖完涼之後，我都會係身上搽上一層薄薄的Bio-Oil®，感覺都好滋潤得而且完全唔覺好笠，加上又有淡淡洋甘菊花，所以都瞓得好舒服呢。相信夏天到來時，整晚開冷氣地瞓時，一定仲會保護皮膚，唔洗俾冷氣抽乾身體上的水份嘛！

由於我手同腳都係比較乾，加上又有好多蚊爛，所以我都集中用於手腳按摩。

開始塗時嘅感覺真係會有丁點兒油，不過一經按摩後就會感覺到比想像中爽身，等一回吸收後就會覺得小腿有光澤同好滋潤呀~

由於我手肘都真係非常乾，啲乾紋都真係明顯得有點嚇人，所以就我將Bio-Oil®推入化妝棉，之後就幫手肘做面膜~

趁睇電視時"FULL"大約半個鐘~

我做左三次之後，明顯啲乾紋淡左啲啲，同埋覺得唔"鞋"呀~

至於疤痕方面，我於手臂上及開刀生小小豬嘅肚皮的疤痕做試驗，每日兩次按摩疤痕(身體上的疤的容許我怕羞唔同大家分享啦)~

可以使用時間尚短，未見有特別大的改善，去疤都唔係一朝一夕嘅事，我會繼續努力持之以恆，希望好快就有好成績啦~

其實最理想嘅效果會係持續用三個月，雖然暫時睇個效果都唔錯，只係疤痕暫未有明顯改善，所以我要繼續努力，希望三個月後會有更好的效果啦！

皇室堡40週年誕生祭

22 APRIL 2014(TUE)

我地去影完WTC豆腐人之後(請按此)，我地當然唔少得去皇室堡影近期勁HIT嘅HELLO KITTY啦~

嘩...原來HELLO KITTY都已經40歲大，睇佢個樣都唔似哦...哈哈！為左慶祝係個重要日子，所以係皇室堡就舉行左一個小型佈置~

我之前已經睇左好多朋友仔嘅靚相，啲HELLO KITTY真係好靚呀！雖然都大型公仔就好似有五個，不過個個都好大又靚，所以我地恨左好耐嚟影相呀！

可能我地都算係晚飯後時段嚟，個個都係食完飯嚟影，所以都有好多人呀。不過唔理咁多，一於排隊影影影啦~

影左一轉之後，小小豬又話想繼續影呀！哈哈哈...話個秘密俾大家知，其實小小豬都幾鐘意HELLO KITTY，因為佢係屋企都有一間KITTY小屋玩具，成日都拎啲KITTY嚟角色扮演呀~

大堂除左有幾個HELLO KITTY佈置之外，仲有一間限定品商店。不過因為都夜夜地，小小豬都有少少扭眼瞓，所以都冇入去八卦。等下次有機會先再去睇吓有啲咩特別嘅限定精品先~

場內啲HELLO KITTY真係好靚好得意，所以如果係HELLO KITTY FANS嘅朋友仔，一定要去皇室堡影一轉呀！

WTC的豆腐人與MeeH

22 APRIL 2014(TUE)

難得出嚟銅鑼灣，當然唔放過去影相機會，所以我地食飽飽之後，就去左世貿中心影相啦~

其實我之前路經過銅鑼灣都睇過一次，都覺得啲佈置好得意，當時仲好唔知醜請其他途人同我影左一張相。

當然一張相我又點夠喉，加上今日又可以同小小豬一齊影，真係非常高興呀~

叫小小豬同我一齊影相時，佢又完全唔合作咁，一到佢自己係個佈置入面邊玩邊影時，睇佢笑得幾開心~

雖然依度都只係細細嘅一個佈置，基本上影幾張相就已經可以走得，不過我地係依度都逗留左差唔多大半個鐘， 冇辦法啦，因為依個傻傻的小小豬不停係度同啲小動物傾計，又將啲復活蛋送俾佢地食，來來回回都唔知幾多轉，真係俾佢笑C呀！

見當時場地冇乜人，咁咪俾佢玩一陣啦，不過佢依個行徑又真係幾攪笑。

所以話呢...如果依個百厭豬唔攪事令人勞氣時，都會做啲估佢唔到嘅攪笑嘢，都為我地帶來不少歡樂呀！